Imphal, Jylliew 23: Ka jingkiew ne ka jngpur ka khlam jingpang Covid-19 ka dang iai bteng hapoh ka jylla Manipur, ha kaba 33 ngut ki briew ba kynthup lang ia kawei ka longkmie, la test positive ha ka sngi u Blei.
Katkum, ki heh ophisar ka tnad ka koit ka khiah, la iathuh ba la don 101 ngut ki briew kiba la shim sample bad kiba la leh ia ka test bad na kine, 33 ngut la shem ne lap ba ki long positive ha ka jingpang Covid-19 ha ki lai tylli ki district ba kynthup ia 27 ngut na Imphal West, 3 ngut na Imphal East bad 3 ngut na Thoubal.
Ki ophisar kila pyntip ruh ba baroh kiba la ioh ia kane ka jingpang Covid 19 kila don haduh 145 ha ka sngi u Blei, ha kaba 103kidei na Imphal West district, 29 ngut na Imphal East district, bad hynriew ngut ha Thoubal district, saw ngut ha Bishnupur,ar ngut na Tengnoupal bad u wei na Kakching district.
Lait noh tang ha ki jaka ba sah ki riew lum ha ha Tengnoupal district, hynrei baroh ki san tylli ki district kiba sah ki hap hapoh ki jaka them jong ka Imphal.
Hapoh ka jylla Manipur la lap nyngkong eh ia ka jingpang Covid 19 kadei ha ka 9 tarik mynta u bnai Jylliew na kawei ka longkmie ba 23 snem ka rta kaba la test positive na ka jingpang Covid-19 ha Manipur, bad kadei ruh ka case ba nyngkong eh ba la lap hapoh ka thain shatei lam mih ngi kaba la shah ktah ha kane ka khlam jingpang.
