Imphal, Jymmang 10: Uwei u shipai Assam Rifles ula mynsaw na ka jingshei kuli ha ki bynta jong ka kpoh, ha ka jingiather kyli bad ki kaikhlaw Kuki ha Imphal East District ka Jylla Manipur.
Haba iakren bad ki nongthoh khubor, u Security Adviser ka CM Secretariat Kuldeep Singh ula iathuh ba kala don ka jingia ther kuli hapdeng ki shipai bad ki kaikhlaw. Uwei u shipai Assam Rifles ula mynsaw naka jingshei kuli na kpoh.
U Singh u pyntip ba ki shipai AR bad ki Pulit kila leit ban jurip ia ka SoO camp bad ianiew ia ka jingdon jong ki tiar siat bad ki.
U Singh ula ong ba ka Jylla Manipur kala sdang wan phai biang sha ka jingjai jai bad ka Sorkar kala nang pynjynsur ia ki kynta jong ka korphiw.Haduh mynta, ka Sorkar kala ioh kurup haduh 284 ki tiar siat bad 6700 tylli ki kuli.
Kane ka jingiakynad pher jaidbynriew ha Manipur kala shim ia ka jingim ki 66 ngut ki briew, ha kaba 41 ngut kila iap na ka jingshah thombor bad kiwei pat kila iap na kiwei kiwei ki daw, ula pyntip,
Ha kawei ka liang, ka All Tribal Students’ Union, Manipur (ATSUM) hynne ka sngi Balang, kala tynrong ia ka jingbahkhlieh ha ka Sorkar Jylla halor ka jingmih ki jingkulmar bad jingiaumsnam kaba la shim ia bun ki mynsiem briew.
Ka ATSUM kala kynnoh ba ka Sorkar Jylla kam shym la leh eiei ban tehlakam ia ki paidbhur kaba lam sha ka jingpyniap ia ki briew bad ka jingwiang ding ia ki iing ki sem bad wat ia ki jaka Mane Blei.
