Imphal, Jylliew 7: Namar ka jingkhang sah ia ka jingtreikam ka kor Internet ha Jylla, ki Nongshongshnong ka Imphal, Manipur, kila leit ban mudui da ka mukotduma sha ka Iingkashari Supreme Court ha ka sngi Ba-ar ban pyrshah ia kane ka jingpynjari jong ka Sorkar.
Ia kane ka mukotduma la mudui da ki arngut ki nongshongshnong ka Imphal kiba pynpaw ba ka jingkhang ia ka kor Internet ka dei ka bym iahap bad kaba leh palat.
Kane kala wan jia hadien ba ka Manipur kala pynjlan ia ka jingtreikam ka kor Internet haduh ka 10 tarik u Jylliew. Kat kum ka hukum na u Commissioner (Home) H Gyan Prakash, kane ka jingkhang ia ka Internet mobile data service kynthup ka broadband, la pynjlan haduh ka por 3 baje janmiet jong ka 10 tarik u Jylliew.
Kane ka mudui ka ong ruh ba ka jingkhang ia ka kot internet kala ktah jur bha ia ka jingsngew para briew, ka jingim, ka kamai kajih, ka bor pyrkhat pyrdain jong kine ki nongmudui bad ki bahaiing hasem.
Kila ong ba kim lah satia ban phah ia ki khun sha skul, sei pisa na ki bank lane ioh pisa na kiba iadei kam lane lah ban sam ia ki tulop, lane iakren lyngba ki email lane whatsapp, kaba la buh ha ka kutlad ia baroh ki briew.
U Nongiasaid ain ka Manipur High Court Chongtham Victor Singh, uba dei uwei na ki nongmudui, haba iakren bad ki lad pathai khubor ula ong ba ka jingkhang ia ka kor Internet kala ktah ia ka jingim ba manla ka sngi jong ki paidbah ka Jylla. Ula ong ba kane ka dei ka kam kaba sngewkhia bha namar kiba bun kim lah shuh ban trei iala ka kam bad ban kamai pisa.
Ka mudui ka ong ruh ba ki paidbah ka Jylla kila mad ia ka jingsheptieng, jingsngew kutlad namar kane ka jingkhang internet. Ka ong ba kim shym lah satia ban iakren bad la ki jong ki baieid bathoin lane ki paralok, ki para ba iatreilang bad kiwei kiwei.
Ki Nongmudui kila onng ba ka jingpynjlan ia ka jingkhang internet haduh san sien kynthih ha ka Jylla ka pyni ia ka jingiuh roit ia ka hok ban kren bad pynpaw jong u nongshongshnong.
Ka PIL kala kyrpad ia ka Iingkashari ban pynbna ia ka hukum ban khang ia ka kor Internet ha ka Jylla kum ka kam kaba be-ain.
