Imphal, Rymphang 16 : Hadien ba la pynjari iaka jingsynshar ka President ne ka President Rule ha ka jylla Manipur, la sakhi ia ka jingpynlong ia ki jingiakhih ha kylleng ki bynta jong kane ka jylla.
Watla ha ki jaka kiba bun ki jaidbynriew Kuki ha ki jaka riewlum la sakhi ba kila pdiang ia ka jingshim rai jong ka sorkar pdeng ban pynjari da ka President Rule ha ka jylla, katba ki sengbhalang kiba don ha ki jaka kiba bun ki jaidbynriew Meitei kila dawa ba dei ban pynduh pyndam noh ia katei ka jingshim rai.
Ka Coordinating Committee on Manipur Integrity (COCOMI) kala dawa ba dei ban weng noh ia ka jingpynjari ia ka President Rule bad kala kyntu ia ka sorkar pdeng ba kadei ban thung beit da ka sorkar kaba pura, katba ha kawei pat ka liang 10 ngut ki MLA ka jaidbynriew Kuki kila pdiang sngewbha ia ka rai ban pynjari ia ka President Rule.
Bun tylli ki kynhun jong ki seng longkmie na ka thain jongka Imphal East kila ialum ha Thumbutgong Brahmapur hynne ka sngi u Blei ha kaba kila pyrta jam bad dawa ba dei ban thung noh mardor da ka sorkar jylla kaba pura.
Haba iakren bad ki nongpathai khubor, kawei na ki dkhot jong ka seng longkmie ka BM Roji kala ong, ki paidbah kila dap da ka jingbitar bad kila mad ia ka jingeh na ka jingbym skhem jong ka sorkar ha ka jylla.
Ka Roji kala ong ba ki don bun tylli ki kynhun jong ka Meira Paibi kiba pynlong ia ki jingiakhih ban pyrshah ia ka jingshim rai jong ka Sorkar Pdeng ban pynjari ia ka President Rule ha ka jylla Manipur.
