Imphal, Iaiong 07 : Hadien ka jingkynad kaba mih ha Thoubal District ka Manipur, ki bor District ha ka sngi Nyngkong kila pynjari ia ka kyndon 163 BNSS ha baroh kawei ka constituency jong ka Lilong Assembly Constituency.
Kane ka jingkynad kala mih hadien ba ki paidbhur kila leit thang ia ka iingsah u President ka BJP Minority Morcha Md Asker Ali namar ka jingkyrshan ia ka Waqf Amendment Act.
Kane ka hukum bala pynjari da ki bor District, ka khang ban ialum paidbah ba 5 ngut ne palat bad ban rah ia ki tiar siat, ki wait, ki dieng, ki maw lane kino kino ki tiar pynmynsaw da ki paidbah.
Kat kum ka khubor, ha ka miet sngi U Blei, ki paidbhur kiba don kumba 7000-8000 ngut, kiba rah ia ki lathi bad ki maw, kila leit thombor ia ka iingsah u Md Asker Ali ha ka thai Lilong Sambrukhong Mamei bad kila wiang ding syndon ia ka.
U Ali ha ka sngi Saitjain ula pynpaw ia ka jingkyrshan ha ki rynsan social media ia ka Waqf Amendment Act, 2025.
Hadien kane ka jingjia ha ka miet sngi U Blei, u Ali ula panmap ia ka jingkynthoh jong u bad ula pynrem syndon ia kane ka Act.
