Imphal, Naiwieng 27: U MLA ka BJP na 54-Nungba Assembly constituency, Manipur Dinganglung Gangmei u la pynpaw ia ka jingsngewkhia kaba jur halor ka jingiai kiew jong ka jingwan buhai shnong bad jingkyntur pud sha ki jaka ba shong basah ki jaitbynriew Zeliangrong.
Ha ka Facebook post, u Gangmei u la maham ba “Ki shnong ba thymmai kila mih ha shilynter ka surok bah” bad “ki briew kiba nabar ki dawa ïa ka hok khyndew jong ki kpa tymmen,” bad kane ka buh jingma ïa ka jinglong kyrpang jong ka imlang sahlang bad ka hok jaka.
“Ka jingsngewkhia ka jong ngi mynta ka long ba ka jingkiew sted bha jong kiba wan buhai shnong bad ka jingwan ban kyntur pud sha ki jaka ba shong basah da ki jaitbynriew Zeliangrong, khamtam eh hapoh Manipur,” u la thoh.
“Ka jingsngap jar jong ka imlang sahlang jong ngi halor kane ka mat ka la pynsniew ia ka jingbha jingmiat jong ngi baroh kawei.Ka la dei ka por ba ka pateng kaba mynta kan ieng bad pynskhem ia la ka jong ka hok, ban iada ia ka khyndew ka shyiap bad ka pateng jong ngi.” u la ong.
U Gangmei, uba dei u ophisar IAS uba la shongthait bad u dei ruh u dkhot jong ka Zeliangrong Naga community u ba paw bad bna nam bha, U la pynpaw ia ka jingdonkam ban iatreilang ban iada ia ki jingmyntoi jong ka jaidbynriew.
Kane ka jingkren jong u ka wan tang hadien san sngi hadien ba ka Zeliangrong United Front (ZUF)—ka kynhun seng kieng atiar kaba dang ïakren ïasuk mynta bad ka sorkar—ka la sdang ïa ka jingkhynra ha ka sien kaba saw pyrshah ïa ka jingrep poppy be-aiñ ha Kangpokpi district ha ka 21 tarik Naiwieng.
Haba sngewkhia halor ka jingioh wan rung tuh kaba la nang jur ha kine ki khyndiat bnai, da kaba nang kiew katkum ki khubor ba ki briew ki ïaid lyngba na Myanmar sha ki jaka khappud jong ka Manipur.
