Imphal, K’lyngkot 11 : Kawei ka wahduid ba tuid sha Imphal Valley kala kylla iong khlein hi ngain namar ka jinglait jong ka umphniang diesel na ka Leimakhong Power Station hynnin ka sngi.
Ka Sorkar Jylla kala hukum ia ka tnad ba dei khmih ba kan leh eiei mardor ha ka ban tem ia kane ka jinglait ka umphniang sha ka wahduid kaba lah ban buh jingma ia ka sawdong sawkun jong ka thain.
“Kane ka umphniang kala tuid sha ka wahduid kaba iaid lyngba ka Kantosabal, Sekmai bad kiwei kiwei. Kane ka wahduid ka dei ruh kaba iakynduh ia ka wah Imphal hadien ka jingiaid lyngba ka Khurkhul-Loitang-Kameng-Iroisemba-Nambul,” ong ki bor Sorkar.
Ka hukum kala ong “Baroh kiba dei khmih la kyntu ba kin lei eiei mardor, ban tehlakam ia ka jingjot jingjulor ka mariang bad ban pyndonkam ruh ia baroh ki tiar ba donkam la ka dei ha ki kor machine, ki briew bad ki stad ki jhad ban tem ia kane ka jinglait ka umphniang”.
Ka video bala saphriang paidbah ka pyni ba ki Nongtrei kila pyrshang ban weng ia ki dieng kiba tuid ha kane ka wahduid. Ha ki katto katne ki jaka, kala don ruh ka jingmeh ding ha kane ka wahduid.
U Myntri ka Tnad PHE Leishangthen Susindro Meitei bad u Myntri ka tnad Forest Thongam Biswajit Singh, kila leit ban jngoh ia kane ka jaka hynnin ka miet.
