Imphal, Lber 27 : Shiphew ngut ki MLA ka jaidbynriew Kuki-Zo kila thoh shithi sha ka Election Commission ka India (ECI) ba kyrpad ba kan pynbeit lem ia ki briew kiba leit riehtngen ha kylleng ka Ri India ba kin ioh thep vote ha ka elekshon Lok Sabha ha Jylla Manipur.
Kine ki 10 ngut ki MLA ki dei kiba nyngkong eh ban dawa phiah noh la ka jong ka bor synsahr na ka Manipur hadien ka jingmih ka thma iapher jaidbynriew naduh ka 3 tarik Jymmang 2023.
Kine ki MLA kila kyrpad ia ka ECI ban khmih ia ki lai tylli ki bynta ba ki Jylla bad ki Union territories ki dei ban ithuh ia ki paid Kuki-Zo kiba la phet wir, ba kin pynkhreh ia ka polling station ba kyrpang bad ban shah ia ki briew kiba la ioh ia ka hok ban thep vote, ba kin thep vote da kaba pyndonkam ia u aadhaar bad kiwei ki kot ki sla.
Kine ki MLA kila ong ha ka shithi “La ioh jingtip ba ka ECI kala pynmih ia ka jingpynbna ban pynbeit jaka thep vote ban ailad ia ki briew kiba phetwir kiba don mynta ha ki jaka riehtngen ha Churachandpur bad Kangpokpi ba kin ioh thep vote.
Lada kum kine ki jingpynbeit la leh ruh na ka bynta ki briew kiba phetwir sha kylleng ki jaka ka ri, ki nongthep vote kin nym duh satia ia ka hok ba kin jied iala ki nongmihkhmat kat kum ka riti synshar ka ri.
Na ka liang ki kynhun Meitei ruh kila thoh sha ka ECI ba kyrpad ban pyntreikam ia ka postal ballot ia ki nongthep vote ka Manipur kiba sah shabar ka Jylla.
 ba kyrpad ba kan pynbeit lem ia ki briew kiba leit riehtngen ha kylleng ka Ri India ba kin ioh thep vote ha ka elekshon Lok Sabha ha Jylla Manipur.){kind=link}