Manipur: Kyllon iap u shipai BSF, mynsaw 2 ngut ki shipai Assam Rifle ha ka jingiather kuli bad ki Kaikhlaw

0
156

Imphal, Jylliew 06: Uwei u shipai Border Security Force (BSF) ula iap bad arngut ki shipai Assam Rifles kila mynsaw jur ha ka jingiather kuli bad ki kynhun kaikhlaw ha Serou hynnin ka miet sngi Nyngkong kaba neh haduh hynne ka step sngi ba-ar.

Une u shipai BSF ba iap u kyrteng u Ranjit Yadav. Ha kane ka jingiather kuli, une u shipai ula mynsaw jur na ka jingshei kuli bad la pynkit mar mar ia u sha Jivan Hospital hynrei ula khlad noh ha lynti.

“Uwei u shipai BSF ula mynsaw jur lem bad arngut ki Assam Rifles kila ha ka jingiather kuli bad ki kaikhlaw ha Serou” ong ka kyrwoh na ki Shipai Indian Army haba iathuh ba ia kine ki shipai Assam Rifle la pynkit noh da ka helipcopter sha Mantipukhri.

 

Kila pyntip ba ki shipai Indian Army ha ryngkat ki Assam Rifles, BSF bad ki Pulit kila leit khynra ha Sungu bad Serou bad ka jingiather kuli kaba jur kala mih hapdeng kine ki bor pahara bad ki kaikhlaw baroh shimiet.

Ki bor pahara kila pynlong ia ka jingkhynra kaba jur ha kylleng ki jaka ka Manipur naduh ka sngi saitjain ban kyndang lut ia baroh ki kynhun kaikhlaw kiba leh ia ki kam pyntriem ha ka Jylla.