Imphal, Jymmang 28: Palat 33 ngut ki kaikhlaw kiba dei jong ki Kynhun bapher bapher, kila kyllon iap ha ka jingiather kuli bad ki bor pahara naduh ba khie ka jingiakynad pher jaidbynriew ha Manipur naduh ka 3 tarik Jymmang, ong u Myntri Rangbah N Biren Singh hynne ka sngi U Blei.
Hadien ba pyniaid ia ka jingialang bad u Heh shipai Manoj Pande, u Myntri Rangbah ula ong ba ki shipai kila pynlong ia ka jingkhynra kaba jur ha kiba bun ki District pyrshah ia ki kynhun kaikhlaw, kiba thombor ia ki riew paidbah ha ki district bapher bapher.
U Singh ula ong ba ha ka jingpynphai markylliang bad jingkhynra pyrshah ia kine ki kaikhlaw, kiba pyndonkam ia ki tiar siat kiba khlain pyrshah ia ki riew paidbah, haduh 33 ngut ki kaikhlaw kila kynnoh iap ha kylleng ki jaka.
Ula bynrap ba ki don ruh katto katne ki kaikhlaw kiba la shah kem ha ki shipai. “Ka Sorkar ka pynrem jur ia ka jinghiar thma ia ki riew paidbah khamtam ha ki District ba long jaka lum” ong u Myntri Rangbah haba iaren bad ki nongthoh khubor.
Ha kajuh ka por, ka Iingsah jong u MLA ka BJP K Raghumani Singh kala shah pynjulor bad artylli ki kali kila shah wiang ding ha Uripok, kaba don ha Imphal West District hynne ka sngi U Blei.
Ki Pulit ki iathuh ba ki paidbah kiba la bitar shla, kila dawa ban leh eiei pyrshah ia ki kynhun kiengatiar ki Kuki bad ki kynhun kaikhlaw, kiba hiar thma ia ka Iingsah u MLA bad ki kwah ban iakynduh ia u Raghumani Singh ban phah leh da kaba tyngeh pyrshah ia ki Kuki kiba wan hiar thma.
U Myntri Rangbah ula ong ba ki jinghiar thma ia ki iingsah ki riew paidbah ha ki jaka lum ha kine ki arsngi, la I kumba ki dei kiba da thmu bad ka dei ruh ka dak ban pyni ia ka jinglah jong ki ban leh ia kane ka kam. U ong ba kane ka dei kaba hap ban pynrem jur khamtam ba u Myntri Khynnah ki kam Pohiing ka Ri Nityanand Rai ula don ha Jylla lem bad ka Kynhun wanrah jingsuk bad lah tem noh ia baroh kiei kiei hapoh ka Jylla.
U Biren Singh ula ong ba kito kiba pyrshang ban phiah ia ka Jylla bad pynthut ia ka jingiashongsuk jong baroh ki jaidbynriew ha ka Jylla, ki dei ki nongshim jong baroh ki 34 jaidbynriew kiba iasahlang ha ka Jylla bad bynrap b aka Sorkar kan iai bteng ban iatynjuh markhmat ia kine ki jingeh.
Dang shen haduh 10 ngut ki MLA kynthup ia 7 ngut na ka BJP, kiba dei na ka Jaidbynriew Kuki, kila dawa ban ioh noh iala ka jong ka Jylla jong ki paid riewlum da kaba phiah ia ka Manipur.
U Myntri Rangbah ula ong ba ka jingiakhun ji ka dei hapdeng ki kynhun kaikhlaw kiba pyrshang ban pharia ia ka Manipur bad ia ka Sorkar Jylla.
Ula ong ruh ba hadien ka jingiathuh ia 38 tylli ki jaka ba don jingma, ka Sorkar kala ithuh ruh sa ia katto katne tylli bad ka Tnad Pulit kala pynjur bha ia ki jingkhynra.
Shibun ki jingjia iather kuli kila mih hapdeng ki bor pahara bad ki kynhun kaikhlaw na kuma 6-7 tylli ki District ka Jylla bad kala don ruh ka jingmynsaw na baroh ar liang, ong ki khubor.
Ki Pulit ki pyntip ba kine ki jingiather kuli kila jia ha kiba bun ki District kynthup ka Churachandpur, Kakching, Imphal East bad Imphal West districts.
