Imphal, K’lyngkot 25 : Ka Indigenous Tribal Leaders’ Forum (ITLF) ha ka sngi Balang kala pynpaw ia ka jingkwah b aka Sorkar Pdeng kan pynjari noh da ka synshar President ha Jylla namar ka jingbym don bor shuh ka Sorkar, kaba la sakhi na ka jingpyndem ha ka kynhun kaikhlaw.
Ka ITLF ka ong ba ha ka sien ba nyngkong eh hapoh ka histori, ka kynhun kaikhlaw kaba ialam ban hiar thma ia ki paidbah ba lui lui namar ka jingiapher Jaidbynriew bad kaba la pyni paidbah ia ki tiar siat bala tuh na ki Pulit, kala lah ban hukum ia ki nongthaw ain kynthup ia u Myntri Rangbah, ba kin wan sha ka jingialang ba ka khot bad pynbor ruh ia ki MLA ba kin kyrshan ia ki jingdawa.
“Ki Pulit ka Manipur bad ki bor pahara ka Sorkar Pdeng kila shu long tang ki nongpeitkai haba u Nongialam ka Arambai Tenggol Korounganba Khuman ula wan poi ha Imphal da ka kali Pulit bad ka kynhun kaikhlaw kila iaid pynbam smai ia ki MLA. Baroh kine kila jia wat hapdeng ka kynhun ba kyrpang ba la phah da ka MHA kala don marjan jong ka Nongbah. Balei ka Ri synshar paidbah kaba heh duh ha Pyrthei ka shah ia kane?” ong ka ITLF ha ka kyrwoh.
Ka ITLF kala ong ba ka jingjia mynta ka sngi kala pyni ba ka Sorkar Manipur kala pyndem ialade hakhmat ka kynhun kaikhlaw.
Kala ong ba ka jingpynjari ia ka President Rule ka dei satang kawei ka lynti ia ka Sorkar Pdeng ban tehlakam ia ka jing bym ain don kanun shuh ha Manipur. Lada ym dei mynta, lano pat.
