Manipur | Khot pakhang shnong ka JDF ba 24 kynta halor ka khana samari, dawa jingshai ia lynti pyntreikam ka NRC

Imphal, Nailar 31: Ka Joint Democratic Front (JDF) ka la pynbna ïa ka jingïakhih paidbah ba 24 kynta ha baroh kawei ka jylla Manipur naduh shiteng synñia ha ka sngi Nyngkong, da kaba dawa ban pynsangeh ïa baroh ki kam kiba ïadei bad ka jinglum khana samari (census) ha ka jylla haduh ban da pynthymmai ïa ka National Register of Citizens (NRC).

Ka jingïakhih ka wan hashuwa ka dorbar jong ka Manipur Legislative Assembly kaba la buh ban sdang ha ka 2 tarik u Nailur. Ka JDF kala dawa ïa ka sorkar ban shim ïa ka rai kaba shai ban pynsangeh ïa ki kam kiba ïadei bad ka Census haduh ban da sdang ïa ka roadmap na ka bynta ka pynthymmai ïa ka NRC.

Ka jingpynbna ka la bud hadien ki jingïakhih kiba la pynlong da ka JDF ha 18 tylli ki jaka bapher bapher ha ka sngi U Blei. Ka jingiakhih pyrshah kaba heh ha Kakching kala long kaba heh bha hadien ba ki pulit ki la khang ïa ki nongïakhih ban ïaid sha District Headquarter.

Ki paidbah kiba bun na Wabagai, Hiyanglam bad ki thaiñ ba marjan kila shim bynta ha ka rally, kaba la sdang na Wabagai-Hiyanglam Lamkhai Keithel. Ki nongïakhih kila pyrta ïa ki ‘slogan’ pyrshah ïa ka jingpynlong ïa ka Census khlem pynthymmai ïa ka NRC bad kIla dawa ruh ïa ka jingpynphai biang ïa ki internally displaced persons (IDPs).

Haba ka rally ka pyrshang ban ïaid sha ka Kakching district headquarter, ki pulit ki la khang ïa ki nongïakhih hajan ka thaiñ Keirak Dam. Ka jingïakynduh kala jia hadien kata, kaba pynlong ïa ki pulit ban siat ïa bun tylli ka lyer pynsat khmat ne Tear-Gas ban pynpra ïa ka jingïalang.

Katkum ka khubor, palat hynñiew ngut ki nongïakhih, kynthup ïa saw ngut ki kynthei, kila shah bat ha kane ka jingjia. Hadien kata, la pyllait noh ïa ki.

U Convenor ka kynhun u Jeetendra Ningombam ula ong, ba ïa ka 24 kynta ka jingïakhih la pynlong ban pynkhlaiñ ïa ka jingpynbor ïa ka sorkar hashuwa ka dorbar jong ka iing dorbar thawain ka jylla.

Ula ong ba ki paidbah ki khmih lynti ïa ka sorkar ban shim ïa ka rai kaba shai ha iing dorbar ban pynsangeh ïa ki kam kiba ïadei bad ka Census bad ban sdang ïa ka roadmap na ka bynta ka jingpynthymmai ïa ka NRC ha Manipur.

U Ningombam ula kdew ruh sha ka jingkyrshan paidbah jong u Myntri Rangbah u Yumnam Khemchand Singh ïa ka jingpynthymmai ïa ka NRC bad ula kyntu ïa u ban rah ïa kane ka mat sha ka sorkar BJP ha ka sorkar pdeng ha ka por ba u leit jingleit sha New Delhi.

U Convenor ula ong, ba ki jingïakhih kila long ha 18 tylli ki jaka bapher bapher ha ka sngi U Blei bad la thmu ruh ban pynlong shuh shuh ïa ki jingïakhih ha ki jaka kiba kongsan, kynthup ïa ka Ema Keithel.

Ki jingïakhih ki la long ha Pheija Leitong, Lamangdong, Nepra Manjor Pukhrimapal, Moirang Bazar, Thoubal Ningombam Keithel, Singjamei Chingamakha, Kakching bad Wangkhei Angom Leikai, nalor kiwei pat ki jaka. Ka Meira rally ruh la pynlong ha Wangkhei Angom Leikai ha ka miet jong ka sngi U Blei.

Ha kajuh ka por, u Myntri Rangbah u Yumnam Khemchand Singh ula mih ban leit sha New Delhi ha ka 30 tarik u Nailar ban ïakynduh ïa ki nongïalam kiba hakhlieh jong ka sorkar pdeng bad ban ïakren halor ki mat bapher bapher kiba ïadei bad Manipur.

Shuwa ban mih, ula kyntu ïa baroh ki bynta jong ka imlang sahlang ban kiar na kaba pynlong ïa ki jingiakhih, da kaba maham ba kum kine ki jingleh ki lah ban pynmih ïa ka jingïaleh bad jingïakynad bad pynjynjar ïa ki paidbah.

Ula kyntu ïa ki paidbah ban pyndonkam da kiwei pat ki rukom jingïakhih kiba dei ki rukom synshar paidbah bad ula ong ba baroh ar ka sorkar Manipur bad ka sorkar pdeng kila kut jingmut ban pyndep ïa ki jingangnud jong ki paidbah.

Ula ai jingïaroh ruh ïa ki jingpyrshang jong ki nongïalam jong 14 tylli ki Civil Society Organisation bad ka kynhun jong ki MLA kiba la leit ïakhih ha New Delhi dang shen na ka bynta ban pyntreikam ïa ka NRC ha Manipur, da kaba ong ba ki jingpyrshang jongki kila ïoh ïa ka jingkynthup kaba bha.

Ha kajuh ka por, u Khemchand ula maham ba yn shim ïa ka sienjam kaba tyngeh pyrshah ïa kino kino kiba pynkheiñ ïa ka aiñ lane kiba pyrshang ban pynlong ïa ka jingkulmar.

Ka JDF kala pynskhem ba ka jingïakhih jong ka kan bteng haduh ba ka sorkar kan pynbeit ïa ki jingdawa jong ka. Ka seng ka kwah ïa ka sorkar ban pynsangeh ïa ki workshop kiba ïadei bad ka Census bad ki kam ophis bad ban sdang ïa ka roadmap na ka bynta ka pynthymmai ïa ka NRC.

Da ka jingïakhih paidbah kaba 24 kynta kaba sdang naduh shiteng synñia, ka mat Census-NRC la khmih lynti ba kan bteng ban long kawei na ki mat jingdawa kaba kongsan shuwa ka dorbar jong ka iing dorbar ha ka 2 tarik u Nailur.