Imphal, Nailar 03 : Ka Committee on Tribal Unity (CoTU) kala khot da ka pakhang shnong ba 12 kynta ha Kangpokpi District ha ka sngi Palei ban kynmaw ia ka jingdap 90 sngi ka thma iapher jaidbynriew ha Manipur.
Ki paidbah riewlum na kylleng ki jaka kila pynlong ia ka jingduwai kyrpang ha madan Brig Thomas ban kynmaw ia kane ka sngi.
Ki Nongialam ka CoTU kila ong ba kane ka pakhang shnong naduh mynmiet haduh da step ka dei kaba la pynlong ban kynmaw ia ka jingdap lai bnai ka kam iaumsnam bad ban leh burom ia ki mynsiem ba iap jong ki paid Kuki na kane ka kam iaumsnam.
Da ki spah ngut ki kynthei kila ialum marjan ka madan ba pynlong jingduwai bad tylli lang kila kyrpad ia ki shipai bad ki Assam Rifles ba kin ym weng ia ki bor pahara na Kangpokpi District.
Ka rai jong ka CoTU ban pynlong ia ka pakhang shnong kala mih hadien ka jingdaa jong ki ban weng noh ia ki bor pahara ka Jylla kynthup ki Pulit Commando na Moreh kaba dei ka shnong khappud ha Tengnoupal District.
Ki Nongialam ka CoTU kila kynnoh ba bun na ki bor pahara ka Jylla kynthup ki Pulit Commando ki dei jong ka Jaidbynriew Meitei bad namar kane, kine ki briew kin leh ia ki kam kiba pyrshah ia ki paid riewlum Kuki.
