Imphal, Nailur 9: Ki bor pahara hapoh ka jylla Manipur ha ka sngi Ba-ar kila kem ia 14 ngut ki briew ba kynthup lang ruh ia ki lehnoh bad ki nongkhaii drug bad kila lap ruh ia kawei ka jaka shet kyiad beain ha ka jingkhynra ba la pynlong ha kylleng ki jaka jong ka jylla.
Ka jingkem ïa ki 11 ngut ki lehnoh kidei ba don ka jingïadei bad ki kynhun ba don ha ki them bad ki lum kum ka People’s Liberation Army (PLA), Kangleipak Communist Party (KCP), bad ka People’s Revolutionary Party of Kangleipak (PREPAK).Ki bor pyniaid ki la kurup ruh ia phra tylli ki tiar siat, ki dawai pynbuaid bad kiwei kiwei.
U nongaiktien jong ka tnat defence u la ong ba ki jingiatreilang kiba kynthup ia ki shipai, ki Assam Rifles, bad ki pulit jong ka Manipur kila pynlong ka jingkhynra ha ki hynniew tylli ki district ba kynthup ia ka Churachandpur, Bishnupur, Chandel, Thoubal, Kakching, Imphal West, bad Imphal East- ha ka taiew ba la dep.
Ha Imphal West, lai ngut ki dkhot jong ka PLA bad KCP la kynnoh ba ki donkti ha ka kam dawa pisa bad ia kine la ioh ban kem.Ki bor pahara ki la ioh ban kurup ruh ia ki thuk thuk, mobile phone, bun tylli ki sim card, bad ki kot ki sla ba kynthup ia ki Aadhaar bad ki PAN card.
Ha kajuh ka por, ha Churachandpur district, ki pulit kila ioh ban kem ia ar ngut ki nongkhaii drug kiba la tip kyrteng kum u Thanglunpau Sukte (32 snem) bad u Hauginlian Phaipi (35 snem) ha Guite check gate, bad ki pulit kila ioh ban kurup haduh 176 tylli ki synduk sabon ba khia haduh 1.9 kg u brown sugar kiba la buhrieh bha hapoh kali. Ha Imphal East sa u wei u briew la ioh ban kem uba la tip kyrteng kum u Aribam Mansish (23 snem), ha ryngkat bad u ganja ba khia haduh 1.94 kg.
Ha shwa ba u Myntri Rangbahduh ka ri u Narendra Modi un wan iuh kjat sha jylla Manipur, ki bor pahara ki la sdang ïa ka jingkhynra kaba jur bha pyrshah ïa ki riew pyrshah ïa ka imlang sahlang kiba treikam ha kane ka jylla.
“Ngi la kem bun ki nongkhaii drug, bad ia ki kai khlaw na ki bynta bapher bapher jong ka jylla bad kiba bun na ki la phah sha phatok.Ngi shim ne thaw ia ki lad ki lynti ba tyngeh ban pynduh jait ia kano kano ka jingma na kum kine ki kynhun ba pyrshah ha ka imlang sahlang,” la ong u heh pulit.
