Imphal, K’lyngkot 31:Ki shipai na ka Tengnoupal Battalion hapoh ka jingialam u Inspector general of Assam Rifles (South) ki la lah ban pynpulom noh ia ka jingthmu khaii beain ia u drok brown sugar lyngba ki jaka khappud hapoh ka shnong Khudengthabi ha ka 28 tarik mynta u bnai.
Ki shipai ka Assam Rifles (South) ki la ioh ruh ban kem noh ia u briew uba donkti ha ryngkat u drok brown sugar uba don ka jingkhia 3.443 gram bad uba shongdor haduh kumba T. 7 klur ha ki jaka iew beain ka pyrthei.
Hadien ba la ioh ia ka jingtip kaba bniah, ki bor shipai ha ryngkat ki pulit napoh Tengnoupal Police Station ki la pynlong ka jingap shrip hapoh ka shnong Larong Khunao kaba hapohTengnoupal district, kaba la lam sha ka jingioh kurup ia une u drok brown sugar ia uba la thep ha ki 70 tylli ki synduk sabon bad kem noh ia uwei u briew uba donkti.Ia une u drok la buhrieh hapoh ka tank umphniang jong ka kali Eeco kaba don ia u No TEMP A 92553, ong katei ka tnat shipai.
Hadien kane ia une u briew bad ia u drok ba la ioh kurup nalor ka kali la aiti noh sha ki bor puli ka Tengnoupal Police Station na ka bynta ban pynlong shuh shuh ia ka jingtohkit.
Na ka liang katei ka tnat shipai ka la ong ba ia une u drok la kurup noh na katei ka shnong kaba don ha ki bynta khappud ka India bad Myanmar kaba hap hapoh Manipur.
