Imphal, Jylliew 30 : Arngut ki briew kynthup uwei u shipai Ophisar ki Navy bad kawei ka Longkmie, kila iap ha ka jingshah ther kuli ha ki kynhun kaikhlaw Kuki hynnin ka sngi Balang, kaba aiding biang ia ka jingkynad bad jingumsnam ha Manipur, khamtam ha Imphal.
Une u shipai Navy u kyrteng u Waikhim Nilakamal, u la iap ha ka jingther kuli jong ki kaikhlaw Kuki kaba la jia ha iew Khwairanband Bazaar kaba don ha jaka pdeng eh jong ka sor Imphal.
Ki paidbah kila ialum khrui ha kane ka jaka ba kyllon iap uwei u shipai haduh ba ki Pulit kila hap siat da ki tyndong lyer pynsat khmat ban ioh shimti ia ka met.
Ki paidbah haba nyngkong kim kwah satia ban aiti ia ka met bad byrngem ban leit rah ia ka sha ka Iingsah u Myntri Rangbah ka Jylla N Biren Singh kaba don ha Keishampat, Imphal.
Kat kum ka jingiathuh ki Pulit, kane ka jingjia kala aiding biang ia ka jingiakynad bad jingiaumsnam hapdeng kine ki jaidbynriew bad ka jinglong jingman ha sor Imphal kala ima hynrei kaba dang lah pat ban tehlakam.
Ha kawei pat ka jingiather kuli, kawei ka Kynthei kala kyllon iap bad bun ngut kila mynsaw ha ka jingjia kaba jia ha ka thain Leimakhong-Haraothel, kaba hap hapoh ka Kangpokpi District.
Kat kum ka jingiathuh ki Pulit, ki kaikhlaw bala kieng atiar bha kila leit khynra ia bun tylli ki shnong ha Kangpokpi District, ther kuli bad shoh ia ki briew ki bym dei n aka jaidbynriew jong ki.
Kat kum ka khubor, kane ka Longkmie kala shah pyniap ha ka shnong Leimakhong bad bun ngut kila mynsaw n aka jingther kuli ki kaikhlaw.
Na ka liang ki shipai bala synran da ki Pulit, kila her wut wut sha katei ka shnong bad kila pynlong biang ia ka jingkhynra kaba jur ban kem ia kine ki kaikhlaw.
Pule lang ia kane:Â Ka jaidbynriew ka mad iaka jingeh kaba khraw namar bym don ki nongialam, ong u Bah Paul Lyngdoh
