Guwahati, Iaiong 24: Kumba lai ngut ki briew ki la iap ha ka jingiakynad ha Ukhrul district jong ka jylla Manipur ha ka sngi Thohdieng, namar ki jingialeh hapdeng ki kynhun kaikhlaw, ki jingsiat suloi kiba jur, bad ka jingkynnoh thang iing ka la nang pynjur shuh shuh ka jingkulmar ha ka hills district.
Ka tyllong khubor na ki pulit ka iathuh ba ki bor pahara jong ka sorkar pdeng ki la lap ia ar tylli ki met iap ha ryngkat ki tiar ialeh ha ka por kumba 11:25 baje mynstep na kawei ka surok hapdeng ka shnong Mullam bad Shonhphal kaba hap hapoh Litan Police Station katba ki dang iaid sha katei ka jaka.Ka jingtip ba tikna halor kine ki briew kiba la khlad ym shym pat lah satia ban pyntikna.
Ka Kuki civil society groups, ka la kam ba kitei ki arngut ki dei ki “village volunteers” ne nongtrei mon sngewbha jong ka shnong kiba la shah pyniap ha ka jingshah thombor shwa ban mih ka sngi, kaba la kynnoh ba la leh da ki lehnoh Naga kiba la suba ba ki don tiar ialeh, kiba thmu ia ki shnong ba sah ki Kuki. Ka Kuki Organisation for Human Rights Trust, ka iathuh ba katei ka jinghiar thma, ka la sdang ha ka por kumba 5:30 mynstep, ha kaba la iathuh ba ki riew thombor kiba kieng atiar, ki la siat khlem da pyrkhat bad thang ia ki iing ha ka shnong Mullam bad Shongphal, katba ki nongshong shnong ki dang iohthiah lyngngai.La iathuh ba katto katne ngut ki riew paidbah, kynthup ia ki kynthei bad ki khynnah, ki la mynsaw.
Ha ka jingkam ba mar kylliang, Ka Tangkhul Naga Long la ong ba uwei u Naga Village Guard (NVG), uba la tip kyrteng kum u Horshokmi Jamang (29 snem) na ka shnong Chatrick Khullen ha Kamjong District u la shah pyniap kham mynstep hajan ka shnong Sinakeithei.Katei ka kynhun ka la kynnoh ba u la shah byrngem ha ki dkhot ka Kuki hapoh ka Suspension of Operations (SoO) katba u dang iaid pahara hapdeng ka Sirarakhong bad ka Sinakeithei hadien ka jingmih khubor ba don ki lehnoh.
Ki nongshong shnong ki la iathuh ba ka jingsiat suloi ka la sdang ha ka por shiteng miet, hynrei ka la jah noh shipor, bad ka la sdang biang ha ka por mynstep, kaba la bteng haduh katto katne kynta bad ka la pynmih ïa ka jingtieng kaba la saphriang. Ka bor synshar ka shnong Mullam ki la batai ïa kane ka jingjia kum ka “jingthombor kaba la pynkhreh pura,” bad la kam ruh ba ym duna ia ar ngut ki briew kila mynsaw jur bad ia kiwei pat ym pat lah ban pyntikna.
Ka bor ba dei peit ki la pynpaw ruh ïa ka rukom shah thombor dang shen, kynthup ïa ka report ne ka khubor ba la siat ïa ki nongrep ha ka 19 bad 21 tarik u Iaiong, da kaba maham ba ki jingjia kiba ju jia man ka por ki la pynmih ïa ka jinglong jingman jong ka jingtieng bad jingbymshngaiñ ha ka thaiñ.
Hapdeng kane ka jinglong jingman, ka kynhun ba ba bun ki kynthei ki la pynlong ïa ki pakhang surok ha Yaingangpokpi Bazar, kaba la pynthut ïa ka leit ka wan ha ki lynti kiba mut leit sha Ukhrul bad pyrshah ïa ka jingïakynad kaba dang ïai bteng.
La nang pynbun shuh shuh ia ki bor pahara ha katei ka jaka, bad ka jinglong jingman ka dang long kaba shyrkhei.
