Shillong, Iaiong 24 : Ki Pulit ka West Jaintia Hills kila ioh kurup ia ki artylli ki scooty ba shah tuh na ka shnong Pdengshakap bad ioh kem ia san ngut ki runar, kynthup 4 ngut ki khynnah, haba shimkhia ban tohkit mardor ia ki artylli ki jingujor bala mudui ha ka sngi Palei.
Ha ka kyrwoh ba pynmih ha ka sngi Thohdieng, u Additional Superintendent of Police (DSB) CW Lyngdoh u iathuh ba ki Pulit kila ioh pdiang ia ka phone call ha ka 23 tarik Iaiong na u Wanphida O Laloo jong ka Shnong Ummulong, ba pyntip ia ka jingshah tuh ka scooty jongu, kaba don u nombor ML05-W-6877 na Ialong Civil Hospital, Jowai.
Ki Pulit kila shong bishar ia ki video bala ioh na ki CCTV bad kila lah ban ithuh ia kawei ka kali jong ki runar. Haba shimkhia marmar, ki Pulit kila pynlong iaka jingiaid pahara, kaba lam sha ka jingioh bat ia kane ka kali.
San ngut ki briew, kynthup saw ngut ki khynnah, kila shah bat bad la wanrah ia ki sha Phramer Traffic Cell, WJH District ban pynlong ia ka jingtohkit.
“Ha ka jingtohkit,uwei u Khynnah bala don dak kam bymman teng, ula pyntip ba ia ka scooty bat uh la rah sha ka shnong Pdengshakap, West Jaintia Hills” ong u Bah Lyngdoh.
“Halor kane ka jingtip, ka kynhun ki Pulit kala hiar sha ka thain bad kila ioh ban kurup ia kane ka kali tuh hadien bala pyndep ia ki kam ba hap ban leh kat kum ka ain”.
Ha kane ka juh ka sngi, ki Pulit kila ioh pdiang ia ka ujor na u Bastanroy Mawthoh jong ka Nongmensong Langkyrding, ba pyntip ia ka jingshah tuh ka scooty-Yamaha Ray ZR, ba don u nombor ML05-AF-5040 ha ka por 2:30 baje janmiet.
Ia kane kajuh ka scooty lah ioh ban kurup na ka shnong Pdengshakap. “Ia kine ki artylli ki scooty lah kurup noh da ki Pulit bad la wanrah sha Phramer Traffic Cell ban leh ia kaba donkam”.
Une u ASP ula kyntu ia ki nongshongshnong ba kin phikir bha iala ki jong ki kali bad ban pynthikna ba ki don ha ki jaka kiba shngain.
