Guwahati, Rymphang 09: U Nongthombam Biren Singh ula hiar shuki noh kum u Myntri Rangbah ka jylla Manipur, hadien ba kala mih ka jingiakynad kaba jur kaba la neh slem bha hapoh katei ka jylla.
U Biren Singh ula hiar shuki noh hashwa ban sdang ka Dorbar Mang Tyngka jong ka iingdorbar thawain ka jylla bad ki tyllong khubor kila iathuh b aula tyrwa ban pynjari noh da ka President Rule hapoh ka jylla Manipur.
Ha ka shithi kaba ula phah sha u Lat ka jylla u Ajay Kumar Bhalla, u Biren Singh ula pynpaw ia ka jingsngewnguh ia ka jingioh ia ka lad ban shakri ia ki paidbah ka Manipur bad ula pynpaw ia ka jingdonkam ban iai bteng ban shim ia ki sienjam ban shimkhia ia ki mat kiba kongsan kiba mad da ka jylla.
Kane ka jinghiar shuki kala jia ruh ha ka por ba ka Iingkashari Supreme Court ka dang shong bishar ia ka audio tape ba lait tuh, kaba kynnoh ba u don bynta ha ka jingjia umsnam ha Manipur kaba la jia naduh u Jymmang 2023 bad shim haduh 250 ki mynsiem briew bad da ki hajar ngut ki nongshong shnong kila duh noh iala ki iing ki sem.
Ka Kuki Organization for Human Rights Trust kala kynnoh ba kane ka audio tape ka dei ka sur u Biren Singh watla ka Sorkar Jylla kala kyntait bad ong ba ka dei kaba shna thok. Ka Iingkashari kala pan ia ka kaiphod forensic halor kane ka tappe bad buh ban shong bishar biang ia ka kam ha ka 24 tarik Lber.
Ha kajuh ka por, u Singh ula kyntu ruh ia ka sorkar pdeng ba kan pynneh pynsah ia ka jinglong jingman ki jaka ki puta haka jylla Manipur ia kaba ula pynpaw ba kadei ka tyllong jong ka jingriewspah bad ka jingdon ia ki jaidbynriew ki bapher kaba la palat da ki hajar snem. Ula bajur ruh ia ka jingdonkam ban tehlakam ia ka jingwan rung tuh ha ki thain khappud bad ban thaw ia ki polisi kiba pyrkhing bha na ka bynta ban phah leitphai biang ia ki briew kiba la shu wan rungtuh.
Une u Myntri Rangbah ula kyntu ban iai bteng ia ka jingiakhun pyrshah ia ka jingjyllei u droks bad ki kam kieng atiar kiba iadei bad ki jingdih kiba sniew ha ryngkat bad ka banjur ia ka jingdonkam ba npyndonakm da ki kor ki bor kiban khmih bniah bha bad ka jingkiew sted ha ka roi ka par ha ka ba iadei abd ki jingtei ha ki thain khappud ban kyntiew iaka jingshngain bad ia ka leit ka wan.
Ha ka sngi kaba u Biren Singh ula hiar shuki, kala don ruh ka jingjia ha kaba ki briew kiba la kieng atiar kila leit lute ia ka India Reserve Battalion Outpost kaba don ha Thoubal District.
U Singh ula ai khublei ia ka sorkar pdeng kaba la wan ban tuklar mardor bad ual kyntu ba kan bteng ban kyrshan ia ka Manipur ha ka liang ka roi ka par bad na ka bynta ka jingshngain.
Kane ka jinghiar shuki ka jong u ka long ruh kum ka khyllipmat ban wanrah ia ka jingkylla haka kam sain hima sima ha ka jylla Manipur kaba iakhun ban weng ia ka jingiapher hapdeng ki jaidbynriew bad ban wanrah biang iaka shongsuk shongsain.
