Imphal, K’lyngkot 22 : Haduh 10 tylli ki seng sain pyrthei ba don ha ka Liang Pyrshah ba ialam da ka Congress ha ka sngi U Blei kila dawa ia u Myntri Rangbah N Biren Singh ba un pynbeit ia ka all party meeting bad u Myntri Rangbah Duh ka Ri Narendra Modi ban iakren halor ki lad ki lynti ban pynkut noh ia ka thma iapher Jaidbynriew hapoh ka Jylla.
“Ngi don lang bad ka jingpyrshang jong phi ban khring ia ka jingphaikhmat u Myntri Rangbah Duh halor kane ka jinglong jingman hapoh ka Jylla” ong ki 10 tylli ki seng sain pyrthei ha ka shithi bala iasoi lang, kaba la phah sha u Biren Singh.
Kila ong ba haba khmih ia ka jingjyrwit jyrwat kane ka jingeh/iaumsnam, kam long kaba suk ban wad ia ka lad pynbeit khlem ka jingiashimbynta lang jong ka Sorkar Pdeng.
Kine ki 10 seng ki kynthup ia ka Aam Aadmi Party, Trinamool Congress, CPI-M, CPI, Forward Bloc, RSP, Shiv Sena-UBT, Janata Dal-United bad Nationalist Congress Party.
