Imphal, Lber 13: Ka Naga People’s Organisation (NPO) ka la pynrem jur ia ka pakhang shnong ba khlem buh por kaba dang iaid shakhmat da ki sengbhalang Kuki-Zo ha ki jaka lum jong ka jylla Manipur bad ka la aipor 24 kynta ia ka sorkar ba kan weng noh ia ka.
Ka NPO ka la maham ruh ba kan don ka jingma kaba khraw lada ym lah ban pynurlong ia ka jingdawa ha ka por ba la buh.
Ka jingim kaba man ka sngi ka la shah ktah jur namar kane ka pakhang shnong, kaba la pynjari da ka Kuki-Zo Council (KZC) ban pyrshah ia ka jingsdang biang ia ka jingkamai jong ki bos hapdeng ka nongbah Imphal bad ki Hil District lem bad ki jaka ki paid riewlum nalor ka jingleh jong ki Pulit ha ki jaka riewlm ha ka 8 tarik Lber.
Ka jingkulmar kaba jur bha ha ka 8 tarik u Risaw hapdeng ki pulit bad ki nongiakhih, kaba la nang aiding da ka jingioh iaid kamai biang ki bos ha ka surok Imphal-Kangpokpi-Senapati bad Imphal-Bishnupur-Churachandpur, ka la wanrah ia ka jing mynsaw ia 43ngut ki briew, ba kynthup ia ki 27ngut ki bor pahara, bad lam sha ka jingiap jong uwei u nongiakhih ha Kangpokpi.
Ka rai ban sdang pyn kamai biang ïa ki bos ka long shi bynta na ka jingthmu jong ka sorkar ban wanrah biang ïa ka jinglong jingman kaba suk bas ain ha ka jylla hadien ka jingbthah jong u Myntri kam pohïing ka sorkar pdeng u Amit Shah ban “ïaid laitluid” ha kylleng ka jylla.
Ka jingkhang dam kaba la rung sha ka sngi kaba sam ha ka sngi Palei, ka la ktah ïa ka kamai kajih, ka leit ka wan, bad ka jingïoh ïa ki jingshakri kiba kongsan, kaba la wanrah ïa ka jingeh kaba khraw ïa ki paidbah nongshong shnong. Ka NPO ka la kyntu ia ka sorkar ba kan shim khia mardor ban wanrah biang ia ka jinglong jingman ba jai jai, da kaba maham ba ki jaitbynriew Naga kin shim ia la ka jong ka lynti lada ym weng ia ka jingkhang dam.
Ka seng ka la dawa shuh shuh na ka sorkar ban pynthikna ban wanrah biang ïa ki jingshakri kiba kongsan, lada ym lah kan wad ïa ki lad ki lynti jong ka aiñ bad kiwei kiwei ki lad ban weng ïa ka jingeh.
Kumno ka jingkhang dam ka ktah ia ki jaitbynriew Naga (sub heading)
Katba ka jingkhang dam ka long khamtam eh ha ki jaka ba bun ki Kuki-Zo kum ka Kangpokpi, Churachandpur, Tengnoupal, bad Pherzawl district, ka jingpakhang ia ki surok bah– NH 37 bad NH 2 – ki la pynthut ïa ki laiñ pynpoi marbam bad ktah jur ïa kito kiba shaniah ha ki.
Ka surok bah NH 37 kaba ju khot ruh ka Jiribam-Imphal Highway ka pyniasoh ia ka Jiribam (ha khappud Manipur-Assam) sha Imphal bad ka iaid lyngba ki thain ba sah ki Naga – Tamenglong bad Noney. Ka surok bah NH 2, kaba ki khot ruh ka Surok Imphal-Dimapur Highway, ka pyniasoh ia ka Dimapur (Nagaland) sha Imphal bad ka iaid lyngba ki jaka ba bun ki Kuki.
Ka NH 2 ka la shah khang khyrdep man ka por ha ki seng Kuki naduh ba la mih ka jingïakynad iapher jaidbynriew ha Manipur. Ha kawei pat ka liang, watla ka surok NH 37 kam ïaid satia lyngba ki jaka ba bun ki Kuki hynrei ka seng jong ki samla pule Kuki – Jiribam & Tamenglong (KSO J&T) ki la pynjari da ka jingpakhang ha kane ka surok bah, kaba la pyrshah da ka Rongmei Naga Council Manipur (RNCM).
 ka la pynrem jur ia ka pakhang shnong ba khlem buh por kaba dang iaid shakhmat da ki sengbhalang Kuki-Zo ha ki jaka lum jong ka jylla Manipur bad ka la aipor 24 kynta ia ka sorkar ba kan weng noh ia ka.){kind=link}