Shillong, Naitung 28: Ki bor district ka East Khasi Hills kila pynmih ia ka hukum kaba mana pyrshah ia ka jingpyntuid ktieh bad maw ha ki surok ha kylleng ka nongbah Shillong bad ka District baroh kawei.
Ïa kane ka hukum la pynmih da ka District Magistrate East Khasi Hills ka Kong Rosetta Mary Kurbah ban iada na ki jingjia aksiden bad ban pynthikna ia ka jingshngain ha surok, khamtam ha ka por lyiur.
Ka hukum ka khang pyrshah ban pyntuid ktieh bad ki maw ha ki surok, da kaba kdew ba kane ka lah ban buh jingma ia ki nongleit nongwan bad ki kali.
La bthah ba baroh ki trok dei ban tap ia ki mar ba ki kit da ka tarpaulin ban lait na ka jingtuid ka ktieh bad maw bad ban pynkhuid lada don jingtuid haba mih na ki jaka ba pynhap mar.
Ka hukum ka maham ruh ba kino kino kiba pynkheiñ ïa ka hukum kin shah pynshitom katkum ka kyndon 223 jong ka BNS bad kiwei kiwei ki kyndon.
Kane ka hukum ka la treikam mardor bad kan treikam tad haduh dala pynmih da kiwei pat ki hukum
