Shillong, Jymmang 19 : U Vice Chancellor ka North Eastern Hill University (NEHU) Prof Prabha Shankar Shukla ha ka sngi Nyngkong, ula maham ban leh ia kaba donkam lada ka Pro Vice Chancellor Prof Sherwin Sungoh ka rai ban pynlong ia ka jingialang jong ka Academic Council ha ka 21 tarik Jymmang.
Kat kum ka jingong jong u, ka jingialang jong ka Academic Council “ka bym shong ain” ka lah ban buh jingma ia ki degree jong ki samla pule.
“Ka rai jong ka Pro VC ban khot marwei ia ka jingialang ba kongsan kala pynmih ia ka jingkylli halor ka jingshongain bad ka jingkitkhlieh. Kum kane ka rai da ka ProVC ka buh ha ka jingma shuh shuh ia ka kynrum kynram ha ka rukom pyniaid bad buh jingma ia ka lawei jong ki hajar ngut ki samla pule bad ka jingskhem jong ki jaka pule kiba la pyniasoh. Lada pynlong ia ka jingialang la 21 tarik Jymmang, ngan sa leh ia kaei kaba donkam” maham u Prof Shukla.
Haba niew ia ka rai ka Prof Sherwin kum ka rai ba kynrum kynram bad bym shong ain, ula kynnoh ba ka prof Syngoh kala pynbna dalade kum ka Incharge VC hapoh ka jingpynbor jong ka NEHUTA bad kam don satia ia ka bor ba shong ain, ban pynlong ia kum kane ka jingialang hapoh ka NEHU Act bad Statutes. Kano kano ka rai jong kane ka jingialang kin pynmih ia ki dak jingkylli halor ki degree jong ki samla pule.
Shuwa kane, u Prof Shukla ula bthah ia u Joint Registrar ban phah notice ha kaban pynjlan ia ka jingialang jong ka Academic Council. Hynrei, u Joint Registrar u khlem leh eiei halor kane ka jingbthah.
Namar kane ka jingbym leh eiei, u Registrar Col Omkar Singh (Retd) ula pynmih ia ka notice ban pyn long ia ka jingialang ha ka 23 tarik Jymmang, hadien ba bud ia baroh ki kyndon bala buh.
“Wat hapdeng kane, ka Prof Sungoh kala pynmih la ka jong ka notice lyngba u Joint Registrar ban khot ia kane ka jingialang arsngi hashuwa, kata ha ka 21 tarik Jymmang. Kane ka jingleh jong ka kala pynmih ia ki jingsngewkhia kaba jur ha kaba bun kila niew ba ka dei kaba la leh khlem da iohbor bad ka dei ka jingpynkhein ia ki rule ka University, kaba ong ba tang u Vice Chancellor uba don ia ka bor ban pynlong ia ka jingialang jong ka Academic Council” ong u Prof Shukla.
U Prof Shukla ula ong ruh ba ki jingktah jong kane ka rai ka Pro VC ka lah ruh ban pur shabar jong ka phyllaw ka University khamtam ba ka NEHU ka dei ka affiliating University jong kiba bun ki college ha Meghalaya bad ki Jylla ba marjan.
 Prof Prabha Shankar Shukla ha ka sngi Nyngkong, ula maham ban leh ia kaba donkam lada ka Pro Vice Chancellor Prof Sherwin Sungoh ka rai ban pynlong ia ka jingialang jong ka Academic Council ha ka 21 tarik Jymmang.){kind=link}