Shillong, Nailar 11: U Myntri kam pohiing ka Jylla ma Lahkmen Rymbui ula ong ba ka Tnad Pulit kan nym map satia iano iano ruh kiba donkti ha ki kam khaii droks.
Haba iaroh ia ka jingtrei shitom jong ki Pulit ban tehlakam ia ka kam khaii droks ha Jylla, ula ong ba ka lynti ban ia khun tyngeh ia u droks kala sdang mynta.
“Ka jingiaroh ka leit sha ka tnad Pulit, ki la treikam bha shisha bad kane ka dei ka lynti kaba hap ban neh. Ngi dei ban poi sha ka thong ha kaban lah pynpra phom ia ka network khaii droks, pynsajia ia ki nongkhaii ne ki kingpin bad ai jingiarap ban pynkylla ia kito kiba la kyrni ha ka jingdih droks” ula ong.
“Ka tnad Pulit kan ym map iano iano ruh” ong u ma Lahkmen halor ka jingkylli ia ka jingpyrshang jong ka tnad Pulit ban kem ia ki Kingpin.
Ha ka sngi ba-ar, ki Pulit kila kem haduh 37 ngut ki briew kynthup 5 ngut ki kynthei bad 27 ngut ki nongdih droks ha ka jingkhynra droks ha iew Polo.
U Myntri kam Pohiing ula ong ba ka sorkar kam pat ju ioh jingtip ba la die paidbah ia u droks wat haba shit ba shai hangne ha Nongbah Shillong.
“Nga iohi ba ki briew kila kmen bha ia kaei kaba ki Pulit ki leh, to ngin nym kylli balei hynrei ka jingkylli ka long ba kane ka sienjam ki Pulit ka dei ban iai bteng bad poi sha ka thong khnang ba ngin lah khanglad noh ia ka jingpoi u droks ha Jylla” ula ong.
