Shillong, Nailur 12 : U Myntri Rangbah ka Jylla Conrad K Sangma ha ka sngi Ba-ar, ula maham ba ka jingiasoh jong ki College bad ka North Eastern Hill University (NEHU) kan sa shah ktah jur bha lada kim lah ban pyntreikam ia ka National Education Policy (NEP)-2020.
“Ka Registration ne ka jingiasoh bad ka Central University kan sa shah ktah bha. Ki jingktah kin don beit hynrei kane kan ym jia mynta, kane kam dei ka jingbyrngem ba ngi kren ia kane hynrei nga antad ba hadien 4-5 snem haba ki leit ban pynthymmai ia ka jingiasoh, nga thikna ba kane ka kyndon kan sa mih bad ka jingkylli ruh kan mih” ong u Conrad haba iakren bad ki nongthoh khubor.
Kane ka jingkynthoh u Myntri Rangbah kala mih tang shisngi hadien ba ki Nonghikai jong ki 22 tylli ki College kiba don hapoh ka shatri jong ka Meghalaya College Teachers’ Association (MCTA) kila rai ban nym weng satia ia ka Non-Cooperation Movement (NCM) ne ka Boycott kum ka dak ban pyrshah ia ka jingkyntait u Vice Chancellor ka NEHU ban weng noh ia ka jingpynbna ka 12 tarik Naitung, kaba bthah ia baroh ki College bala iasoh bad ka NEHU ba kin pyntreikam noh ia ka NEP naduh une u snem ba mynta.
Hynrei u Myntri Rangbah ula kyntait ban kynthoh tam halor kane ka kam da kaba ong ba um pat don satia ia ki jingtip kiba bniah ia mynta.
Haba pynpaw ba ka Meghalaya kan jam beit shakhmat ha kaban pyntreikam ia ka NEP, u Conrad ula ong “Kan ym don ka jingphai dien pat halor kane”.
Ula kyntu ruh ia ki briew (Nonghikai) bad ki College ba kin wan shakhmat ban iakren halor ki jingeh ba ki iakynduh bad ka Sorkar Jylla.
“Ngi lah ban iakren ia ki jingeh ba phi don, lehse ki jingeh kaba phi iohi ka lah ban nym don satia, lehse ngi donkam ban ioh ia khyndiat ki jingshai bad ki jingiakren. Ka don katto katne ka jingbym iasngewthuh jingmut hynrei ngin hap ban pynshai ia kine” ula bynrap.
U Myntri RAngbah ula ong ba ka Sorkar ka long kaba kloi ban iakren bad ka MCTA bad ban leh eiei halor ka jingsngewkhia ka jong ki.
“Sa shisien, nga pdiang ia ki baroh kiba don jingsngewkhia ba sngewbha wan, u Myntri ka Pule Puthi jong ngi u long uba kloi ban iakynduh bad lada donkam, nga ruh nga long uba kloi ban iakynduh ha kano kano ka por lada phi donkam ia ki jingpynshai..ngi don hangne ban pynshai” ula bynrap.
Nalor kane, u Conrad u iathuh ba ula dep iakren ruh bad bun ki Principal jong ki College bad bun na ki, kila pynpaw ba ki kwah ban pyniaid beit shakhmat bad ka jingpyntreikam ia ka NEP ha kaba ka Sorkar ruh kala kular ban kner lem ia ki jingiarap kaba ki donkam.
Ha kajuh ka por, u Myntri Rangbah ula iathuh ba kam don satia kano kano ka jingai song pisa na ka Sorkar Pdeng haba iadei bad ka jingpyntreikam ia ka NEP-2020.
“…dei ba ka Sorkar Pdeng kala iarap ia ngi ha ki liang bapher bapher hynrei kam shym la don kano kano ka kyndon n aka Sorkar ba ong ba kan ai katta katta ka pisa ha kaban pyntreikam ia ka NEP” ula ong.
Kat kum ka jingong jong u, ka Sorkar Pdeng kala iarap da kumwei pat ia baroh ki Jylla la ka long da ka jingpynmih ia ki jingtei ha ki College, la ka dei ha ka jingkyrshan ban ai jinghikai pyntbit ne kiwei kiwei.
“Nga ai khublei ia ka Sorkar India, khamtam u Myntri ka Tnad Pule Puthi, uba la kyrshan bha ia ka Meghalaya ha baroh ki liang. U ju iarap beit ia ngi. Ngam kwah ban ong ba kim shym la iarap hynrei ka jingai song pisa na ka bynta ka NEP kam don satia” ula ong.
Pule lang ia kane: Mynjur ka Sorkar ban pynkha ia ka Engineering Wing hapoh ka Tnad MLP
Peit lang ia kane
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai!
