Nongpoh, Nailur 28: U Chief Executive Member (CEM) ka Khasi Hills Autonomous District Council (KHADC)Bah Pyniaid Sing Syiem hynne ka sngi Palei u la mahan da kaba tyngeh pyrshah ia ka jingtih khyndew be-ain da u wei u briew ba la tip kyrteng kum u Billu Taro hapoh ka shnong Pillangkata, Ri-Bhoi District.
U CEM ula byrngem ruh ba ka Council kan ujor sha ka ophis u Deputy Commissioner bad ruh da ka ejehar sha ki pulit ka Ri Bhoi District lada une u briew u dang bteng ban tih ia ka khyndew na katei ka jaka.
Ia kane ka jingmaham, u CEM u la pynmih hadien ka jingleit jurip ia katei ka jaka tih khyndew beain ha Pilangkata ban shalan sha Assam.
U CEM ula hiar jurip dalade ia kane ka kam beain hadien ka jingioh jingtip ba une u briew ula tih khyndew khlem da ioh jingbit na ki bor ba dei peit jong ka sorkar Meghalaya khamtam ka District Council, ki bor Hima bad kiwei kiwei.
Haba iakren bad ki nongthoh khubor, u CEM u la ong, ba hadien ka jingtip ia ka jingdon ka jingtih khyndew beain ha ka thain, ka District Council ka la dep ban phah jingthoh ne ka Show Cause Notice ia u Billu Taro u trai katei ka jaka ban wan ai jingshai bad ban pynshisha ia ki kot ki sla hapoh ka 15 sngi.
U iathuh ba kane ka jingaipor kala kut bad une u briew u khlem wan mih satia ne ai jingpynshai ia ka show cause notice. Nalor ka jingburom ia ka Council, u dang bteng hi ia ka jingtih khyndew tangba la ioh jingtip ba u tih ha ka por mynmiet.
U CEM ula aipor biang sa arsngi ia une u briew ba un wan pynshai bad pynshisha ia ki kot ki sla ka jinglong trai ia ka jaka lem kumta ka Council kan ujor noh sha ki bor District ba kin leh ia kaba donkam.
Ha kane ka jingjurip, ia u CEM la synran da u majistor ka Ri Bhoi u Bah Eric K Dkhar, nalor ki ophisar ka KHADC, ki nongialam ka Hima Mylliem, ki nongialam ka KSU bad HNYF Ri Bhoi District bad kiwei kiwei.
