Shillong Nohprah 23: Namar ka jingwan ka Tlang bad khamtam ka jingrben u lyoh uba kah dum, ki pulit jong ka South West Garo Hills (SWGH) kila pynmih ia ka jingmaham ia ki nongniah thuk thuk ba kidei ban kiar ka pynher ia ki thuk thuk bad la bthah ia u nongniah bad uba shong nadien ba kidei ban phong ia ki Helmet.
Ha ka jingpynmih jingpynbna, u Superintendent ka SWGH u Vikash Kumar, ha ka sngi Thohdieng ula ong, ba ha ka por tlang ka jingjur bha ka jingkah dum jong u lyoh uba rben ha ka State Highway (SH)-12 kum ka surok na Tura shaduh sha Purakhasia bad ka State Highway (SH)-6 na Garodoba shaduh sha Monabari-Mankachar bad namar ka jingsakhi iaka jingjia aksiden khah khah kaba la pynjulor ia ki kali, ka jingmynsaw bad wat ki khep ba la duh ruh ia ka jingim jong kiba lui lui.
Kumta ban kiar ban lait na kitei ki jingjia, la bthah ia ki nongniah kali bad ki nongniah thuk thuk ban kiar na ka jingpynher sted bad ban niah khlem akor.
Ula ong, ba ki pulit ka District kin pynbor ban phong ia ki Helmet ia u nongniah bad ba shong nadien, ban deng ia u Seat Belt na ka bynta ki nongniah kali bad uba shong hakhmat katkum ki kyndon jongka Motor Vehicle Act.
Ula bthah ruh ba dei ban kiar ban niah kali ne thuk thuk hadien ba la dep dih kyiad ne kino kino ki jingdih pynbuaid.
“Ki nongniah bad kiba shong nadien la bthah ba kidei ban thied bad ban phong ia ki Helmet ban pyndep ia ki kyndon jong ka jingshngain bad kiba don iaka dak jong ka ISI” ula ong.
Ula pyntip ruh ba ki pulit ka Ampati kin sa buh ruh ia ki jaka ban pynlong iaka jingkhmih bniah ha kylleng ki bynta bad kin talasi ia ki kali, ki kot ki sla kali, ka lisen niah kali, ban deng ia u Seatbelt, ban phong iaka Helmet na ka bynta ki nongniah bad kiba shong lang bad ka jingiashong 3 ngut ne ka jingkit bun ngut ki nongshong kali hapoh u pud u sam jong ka South West Garo Hills District bad kino kino kiba pynkheiñ ia ki kyndon jingbthah kin shah pynshitom katkum ki kyndon jongka Motor Vehicles Act.
“Na ka bynta ka jingshngain jong ki nongpyndonkam ia ka surok, ban pynduna iaka jingjia aksiden bad ka jingduh ia ka mynsiem briew, ki pulit ka Ampati ki kyntu ia ki paidbah ba kin ai ia ka jingiatreilang bad ban long kiba shah shipor haba pynlong ia ka jingkhmih bniah” la kyntu u SP.
 kila pynmih ia ka jingmaham ia ki nongniah thuk thuk ba kidei ban kiar ka pynher ia ki thuk thuk bad la bthah ia u nongniah bad uba shong nadien ba kidei ban phong ia ki Helmet.){kind=link}