Maham ka UHM ia ka CWC bad MLMF ba shim kabu ia ka jingjia Ichamati

Shillong Iaiong 01: Ka United Hynñiewtrep Movement(UHM) kala pynrem jur iaka Coordination and Welfare Committee (CWC) kaba kynnoh iaka KSU halor ka jingshah pyniap ki arngut ki bar jylla ha Ichamati haka 27 Lber 2024.

U President ka UHM Bah Charlie J Rani, ula ong, “Ka seng ka maham jur ia ka CWC ban shu padiah khlem nongrim ioh namar lyngba kane ka jingpadiah kulmar, ka lah ban pynpoi pynban sha ka thma kaba heh”.

U Bah Rani ula ong, “Ka seng ka buh jingkylli ia ka sorkar jylla hato kito ki mynder kiba shim iaka jingim jong u Lurshai Hynñiewta (Bam kwai ha dwar U Blei) ki lah shah pynsaja katkum ka aiñ nalor ba lah tip thikna ba dei maki ba leh ia ka kam bymman”.

“Hato ka sorkar ka lah ioh kem ia u Vicky Dey uba byrngem iaka KSU kumjuh iaka jaitbynriew Hynñiewtrep ban pyniap klep ia ngi” ula bynrap.

U Bah Charlie ula ong, “Ka UHM ka phah ia ka kyrwoh kaba shai sha ki bar jylla bad khamtam sha ka CWC ba wat pynbor ia ngi ki dkhot ka jaitbynriew Hynñiewtrep ba ngin shim ia ki sienjam ba tyngeh da kane ka jingtei pop iaka KSU bad kumjuh iaki dkhot ka jaitbynriew jongngi haba ka aiñ ka don ban bishar sngewbha wat padiah kulmar”.

Ka UHM ka maham ruh iaka Meghalaya Linguistic Minority Forum (MLMF) ba ka dei ban sangeh mardor halor ka jingthmu ban shong kyllaiñ mungor ha Khyndailad namar kane kan long pynban kum ba theh umphniang iaka ding ba dang Klang mynta.

“Lada ka Sorkar kan ailad ia ka MLMF, khlem pep kan sa poi sha ka jing iapher jaitbynriew bad kan sa mih ruh ka jing ia pyni bor bad lada jia ba mih kano kano ka jingjia ba sngewsih, ka sorkar kan hap shim hi iaka jing kit khlieh” ula ong.

Ha kajuh ka por, ka UHM kala pynrem ia ka Sorkar Kmie halor ka jingpyntreikam iaka Citizenship Amendment Act haba dawa ban pyntreikam noh mardor ia ka Inner Line Permit (ILP), ka jingpynrung iaka ktien Khasi haka Khyrnit ba Phra jong ka Riti synshar ka Ri India bad ban pynthikna ia u pud u sam ba biang”.