New Delhi, Lber 16: Ka Election Commission ka India, kala maham ban leh tyngeh ia ka jingpynsaphriang ia ki khubor lamler khamtam ha ki social media bad ki lad pathai khubor, ha kane ka elekshon Lok Sabha ba 18, bala pynbna tarik hynne ka sngi Saitjain.
U Chief Election Commission Rajiv Kumar haba pynbna ia kane ka elekshon ba 7 phase ha New Delhi, ula kdew ba ki khubor lamler bad jingpynsaphriang khubor thok, ki dei ki kam ba sngewkhia bha da ka Election Commission bad kane kala jureh naduh ka jingmih jong ki social media.
Ula ong ba ka hok ban kynthoh pynrem ka dei kaba shah ha ka por elekshon hynrei ym lah pat ban shah ha kaban shna ia ki khubor lamler ka bym shym la pynshong nongrim kat kum ki sakhi satar namar ka lah ban ktah ia ka shongsuk shongsain.
“Ki jingpynsaphriang khubor lamler ki pynjynjar bha ia ka ECI ha ka por elekshon. Shen ngin sa pynmih ha ka website jong ngi ia kaba ki khot Myth versus Reality ban ialeh pyrshah ia ki khubor lamer” ong u Rajiv Kumar.
Kala maham ruh ia ki nongshna ia ki khubor lamler ba kin shah pynsajia da kaba tyngeh kat kum ki ain ki kanun bad kala aibor ia ki Ophisar ba kin pynduh jait ia ki.
Ban tehlakam ia kane, ka ECI kala wanrah ruh ia ka Standard Operating Procedure lane SOP ban kloi leh eiei pyrshah ia ki khubor lamler, pyntip u CEC.
