Khang ia ki Kyrtong ban sieh lama ha ki kali khlem jingbit
Shillong, Rymphang 20 : Ka Election Commission of India (ECI) kala maham ban leh da kaba tyngeh ia kino kino ki kyrtong ne ki Political Party kiba pynkhein ia ki kyndon jong ka Model Code of Conduct haba khang pyrshah ban wah ia ki lama ne tah sticker ha ki kali khlem da ioh jingbit na ki Returning Officer (RO).
Ka Ophis u Assistant Commissioner & Officer ba khmih ia ka Model Code of Conduct ka pyntip ba kala ioh jing tip ba bun ki kyrtong kila wah ia ki lama ha ki kali jong ki party ba ki mihkhmat khlem da ioh jingbit na ki RO. U ong ba kane ka dei ka jingpynkhein ia ka ain.
“Namar kata, ia kane ka kyndon yn sa pyntreikam lada dang lap bad iohi ia ka jingpynkhein ain jong ki kyrtong” ong une u Ophisar.
Haba kren halor ka jingpyndonkam jong ki Nongtrei ki Political Party ia ka lama jong ka party ne ki banner hala ki iingsah, une u Ophisar ula ong ba nalor ka jingpyrkhing kat kum ka Motor vehicle Act bad ki hukum ki Iingkashari kiba la pyntreikam, ki Political party, kyrtong, ki agent, ki nongtrei bad nongkyrshan ki lah ban wah ia ki banner, lama hala ki jong ki Iingsah kaba dei ban long da ka mon lajong khlem ka jingpynbor jongno jongno ruh bad ruh ba kine ki jingle jong ki, kim dei ban ktah ia kiwei pat.
U ong ba lada kine ki banner, ki lama bad kiwei, ki dei kaba la leh da ka jingthmu ban khring ia ki vote naka bynta kino kino ki kyrtong, kane kan khring ia ka kyndon 171H jong ka Indian Penal Code bad kin ngat ha ka jingpynsajia kat kum kane ka kyndon.
La ong ruh ba ki briew kim dei ban wah lama lane banner lane tah sticker ha kino kino ki kali lait noh kiba la ioh jingbit na ki bor ba dei khmih bad ruh kiba iaid kat kum ki kyndon ain bad ki hukum ka Iingkashari lada don.
Ula ong ruh ba ka jingai jingbit ia ki kali ba pyndonkam da ki kyrtong yn ai da ki District Magistrate/Returning Officer bad kine ki dei kiban wah ia ki permit ha ki iit jong ki kali.
U ADC ula bthah ia ki Sector Officer ba kin leh da kaba tyngeh pyrshah ia ki kali ba pynkhein ain ki bym don ia ki permit ban wah lama lane tah sticker, banner bad kiwei kiwei.
