Nongpoh, Nailur 29: Halor ki jingeh ba ki paidbah ki mad hakaba iadei bad ki nongpang kiba thiah pang haka jaka sumar jong ka Bethany Outreach Hospital Nongpoh, lada ki nongpang ki donkam iaka snam ki hap ban wanrah iaka snam na Guwahati bad ki hap ban siew haka dor kaba rem.
Halor kane, ka seng HNYF Nongpoh circle bad KSU Nongpoh Circle haka jingiadon lang u bah Markus Marten u President ka HNYF Northern Region, ki la leit ban ia kynduh ia u Dr. CM Pohdhna Doctor In-Charge uba dei peit iaka Bethany Hospital ban lap na kiei ki daw ba ki paidbah ki hap ban mat ia kine ki jingeh.
Haba kren sha ki lad pathai khubor, ki Nongialam jong ka HNYF ki la pynpaw iaka jingsngew lyngoh ba wat la ka Seng ka ju leit ban noh synniang iaka snam ha Civil Hospital nongpoh bad bun kiwei kiwei ki Seng bad ki riew shimet ki ju pynlong iaka program ban ai snam ha Civil, hynrei balei ba ki nongpang kiba thiah pang ha Bethany kin hap ban da thied iaka snam na shabar ka jylla haka dor kaba rem.
Ki la pynpaw ruh, ba hadien ba ki la dep ban kynduh ia u Doctor Incharge, ki la ioh jingtip ba dei namar ba ka Civil Hospital ka don tang ka Whole Blood bad kam pat lah ban ai iaka snam kaba khuid kaba ladep ban jar bha kaba la tip kum ka Components Blood kaba tikna ba dei kaba bha na ka bynta ki nongpang bad naka liang ki Doctor jong ka Bethany ki kwah ban ai ka jingsumar kaba bha na ki ba bha tam sha ki nongpang, bad dei halor kine ki daw ka pynlong iaka Bethany ban shim snam na Sha bar ka jylla.
Ki Nongialam jong ki ar Seng ki kyntu sha ka sorkar ba kadei ban nang leh bha shuh shuh ha kaba iadei bad ka blood bank ha Civil Hospital Nongpoh, ban buh ruh ia ki tiar kiba lah ban test ia ka snam khnang ba ka Civil Hospital kan lah ban ai iaka jingshakri kaba bha sha u nongpang bad khang ba ka Civil Nongpoh kan lah ban pynbiang iaka snam kaba bha katkum ka jingong jong ki Doctor ka Bethany, khnang ba ki paidbah kin nym mat shuh iaka jingeh ha ba iadei bad ka jingdonkam iaka snam.
