Shillong, Risaw 04 : Ka jingther u slap ba khlem sangeh naduh ka sngi Palei ha kylleng ka Ri-lum Garo, kala wanrah ia ka jingshlei um bad ka jingtwa khyndew kaba shyrkhei ha kylleng ki jaka, kaba lam sha ka jingiap jong kawei ka Longkmie bad ka jingmynsaw ia bun ngut.
Ka kynhun State Disaster Response Force (SDRF) kala hiar leit ai jingiarap ha kylleng ki jaka khamtam ha ki jaka ba shlei um kum ka Silkigre PHC kaba la donkam kyrkieh ia ka jingiarap.
Kawei ka Longkmie ba 57 snem ba kyrteng ka Santa N Marak kala iap na ka jingtwa khyndew ha ka shnong Koinabui ha ka por kumba 7:30 baje mynstep bad ka khun ba 28 snem Moralistic N Marak kala mynsaw bad la pynkit sha Community Health Centre ha Dalu ban ai jingsumar. Kine ki arngut ki dang iatreikam ha kamra shetja ha ka por ba wan lynshop ka khyndew kaba la twa kynsan kynsan.
Na ka liang ki bor District kila kyntu ia ki nongshongshnong ba kin kynriah noh na ki jaka kiba idon jingma bad kila khot ruh ia ka National Disaster Response Force (NDRF) ba kan wan ai jingiarap lem.
Kylleng ki jaka jong ka Ri-lum Garo khamtam ha ka surok Dalu-Tura National Highway, ka jingtwa khyndew ka long kaba la shyrkhei bha bad ka NHIDCL bad ka tnad PWD kila bunkam naduh mynstep ban pynkhuid ia kane ka surok.
Ha ka jaka hajan ka Iingsah u Lt.Clement Marak kaba don ha Jerusalem Road, lain gut ki briew kila sahkut hapoh Iing na ka jingtwa khyndew. Da ka jingkloi wan poi ka kynhun SDRF bad SRT, ia kine ki briew la lah ban sei noh shabar.
Napdeng kine, ka Parcella A Snagma ula kdiah ka kjat katba u kurim u Dhurbo Newar bad u khun u Fredrick A Sangma kila shu mynsaw malu mala. Ia kine la pynkit noh sha hospital ban ai jingsumar.
Ka jingpynjulor jong ka mariang kala jia ha kylleng ki jaka kynthup ka Reserve Gittim, Modoltila, Rishipara, Hawakhana, Sweeper Colony, Kamipara, Sunny Hills, Matchikolgre, Akonggre, bad kiwei kiwei ki Shnong.
