Shillong, Jymmang 01 : U phria uba wan ha ryngkat u lapbah, ula lynshop hi lin ha kiba bun ki shnong ka Eastern West Khasi Hills, kaba lam sha ka jingpynjulor laki laka ia ki Iing bad ki jaka rep.
Kane ka jinghap u phria kala jia hapdeng ka por 10 baje mynstep haduh 10:30 baje eiei. Ki Shnong kiba shah ktah jur bha ki kynthup ia ka Mawkohmit, Mawblei, Rikhen, Thangmaw bad Nongrang.
Ki Iing kiba kot spah tylli kila julor bad pei thliew lut ki tnum na ka jinghap u phria uba la iathuh ba u heh kat ki marble bad palat, haduh ba bun kila hap ban leit sah noh sha ki iing jong ki bahaiing hasem bad ki marjan marpa.
Ka jingpynjulor jong une u phria kala ktah jur eh ia ki jaka rep bad ki nongrep kila shu pait mynsiem ban iohi ia ka jingtrei shitom kaba la shah pynjot tang da ki khyllipmat.
Ki jingthung kynthup naduh u phan, biskot, sohmynken bad kumjuh ruh ki diengsoh kila julor lut ha kane ka jinghap phria.
Na ka liang u MDC ka Mawthadraishan Bah Powell Sohkhlet, ula hiar ban jurip ia kine ki shnong bad iakynduh ruh ia ki lanot bad ki nongialam shnong.
Une u MDC ula pyntip sha ka Block Development Officer (BDO) ka Mairang ba kan phah jurip kyrkieh ia ki Ophisar bad ban pynsted ia ki lad ai jingiarap.
Kumjuh ruh, kawei ka Shnong ha West Khasi Hills kala shah pynjulor jubor bha ha u phria uba wan ryngkat bad u lapbah hynne ka step por 9:30 baje eiei. Kane ka shnong ka dei ka Shnong Mawkadiang, kaba mad ia ka jinghap u phria uba la neh palat 1 kynta eiei.
Ha kane ka Shnong, da ki phew tylli ki Iing kila julor na ka jingpei lut ki tnum iing. U Sordar ka Shnong Bad Paising Puwein ula pyntip ba kat kum ka jingioh jingtip ka Shnong, la antad ba ki don kumba 20 tylli ki Iing kiba la julor.
