Guwahati, Naitung 9: Kumba 32 hajar ngut ki briew kila shah ktah na ki hynriew tylli ki district jong ka jylla Assam, haka wat kaba ar jong ka jingshlei um bad haduh 29 ngut ki briew kila iap hapoh ka jylla.
Ka jingiap briew na ka jingshlei um bad ka jingtwa khyndew mynta u snem kala kiew sha 29 ngut ba kynthup lang ia hynriew ngut kiba la khlad na ka jingtwa khyndew.
Ki bor ba dei khmih jong ka Assam State Disaster Management Authority (ASDMA) kila iathuh ba kiba iap kidei na ka Morongi revenue circle jong ka Golaghat district.
Baroh ki don haduh 13 tylli ki revenue circles bad 169 tylli ki shnong ha ki hynriew tylli ki district jong ka Golaghat, Hojai, Nagaon, Sivasagar, Jorhat bad Karbi Anglong kiba la shah ktah.
Ki don palat haduh 32, 300 hajar ngut tam kiba la shah ktah bad ka Golaghat kadei kawei kaba la shah kath jur bha na kane ka jingshlei um bad ki don kumba 19,500 ngut ki briew kiba la ngat ha kane ka jingshlei um.
Ka jingtwa ba jur eh kadei ka kynroh jong ka wah Dhansi kaba don ha West Dhudang kaba hap hapoh jong ka Bokakhat sub-division ia kaba la um kala shlei ha baroh kawei ka shnong bad kane kala pynlong ia ki hajar ngut ki briew ban duh ia la ki iing ki sem.
Ka Doboka kala sakhi ia kawei na ki jingshlei um kaba shyrkhei tam ha ka jingkynmaw ba dang shen namar ba ka wah Yamuna, kaba la pynshlei ia ki jaka ba thymmai kynthup ia ka Longlibasti hadien ba ka la pynngam ia ka sor Doboka bad ka Dighaljaruni.
Ha Nagaon district, Kampur bad ka thain Kathiatoli kila mad shisha ia ka jingjynjar na ka jingwan ba-ar sien jong ka jingshlei um tang mynta u snem.
Ka jingshlei um jong ka wah Dhansiri kala ktah ia 20 tylli ki shnong ha Khumtai bad kane kala pynthut shisha ia ki kam ba man la ka sngi. Ka Dhodar Ali road, kadei ka surok ba kongsan bha kaba pyniasoh bad ka surok bah NH-39, kala ngan hajan ka Letekuchapari, bad kane kala pynthut ia ki hajar ngut ki nongleit nongwan kiba kynthup ia ki nongtrei na ka Numaligarh Refinery.
Baroh ki don haduh 4,265 ngut ki briew kiba la shah pynkynriah bad kila leit ban sah shipor sha ki 33 tylli ki relief camps, katba 27 tylli ki jaka sam jingiarap ki dang trei kam.
Ki jaka rep ki jaka riang kiba don haduh 2,470 hektar ruh ka la shah tap um lut, la ong ka khubor jong ka ASDMA.
