Nongstoiñ, Jylliew 15: Ha ka step phyrngap jong ka sngi palei ha ka por kumba lai shiteng mynstep, ka erїong ka la lynshop ha kylleng ki jaka jong ka West Khasi Hills ha kaba ki jingthung jingtep ki la julor lut kynthup ruh ki їing ki sem.
Kawei na ki shnong ha West Khasi Hills kaba la shah ktah jur ka dei ka shnong Mawrok kaba jngai tang kumba lai kilomitar na Mawliehbah Mawnar.
U Nongthoh khubor ka Shlem u la leit sha katei ka shnong ba peit їa ka jinglong jingman,ha kaba la lap ba ki khlaw ki la julor thiaw, ki dieng ki la dkut, ki nar post electric ki la khyllem na ka jingiaid lynti ka eriong.
U Sordar ka Shnong bah Ambrose Langrin ula pyntip ba hynriew tylli ki їing kila shah pynjulor ha kane ka eriong bad kine ki iing ki dei jong u bah Samuel Mangu, Shestar Ryntathiang, kong BertilaMyrthong, bah Jriak Mawlong, bah Besking Shangoi bad bah Pholdingstar Langrin.
Kane ka eriong kala pynjulor ruh ia ki sem masi, ki jingthung jingtep kum ki riewhadem, ki jhur ki jhep, ki diengsoh ba bun jait bad ki dieng kait ki la kyllon lut ha ka jingkhyrwit ka lyer.
La lap ruh ba haduh lai tylli ki electric polls kiba hajan ki їing briew ki la kyllon ha madan. Nalor kata la їoh jingtip ruh ba ar tylli ki їing ha ka shnong Kaitkohram kaba don ha katei ka thaiñ ki la julor.
Halor kane ka jingjia, u Sordar ula leit ban їakynduh їa ki ophisar sorkar ha Nongstoiñ ban ai jingkheiñ їa ka jing julor jong ki їing ki sem bad ki jingthung jingtep.
