Shillong, Jymmang 28 : Ka Cyclone Remal kala syllad naphang ia ka thain Shatei Lam Mihngi kynthup ia ka Jylla Meghalaya, kaba la wanrah ia ka jingiap jong uwei u briew, ka jingmynsaw ia bun ngut, ka jingtwa khyndew bad ka jingshlei um ha kylleng ki jaka jong ka Jylla.
Kawei ka jingjia ba sngewsih kala jia ha ka shnong Sutnga Weilong, ha kaba ka Iing kala twa bad uwei u briew ba 26 snem ula iap katba arngut pat kila mynsaw jur.
U lapbah bad ka eriong kila pynjulor ia kiba bun ki longiing ha Nonglang, Rangmaw, Laddommawiong, Sohdyniang bad Diwian Mawiong jong ka thain West Khasi Hills, bad pakhang lynti ruh ia ki surok ha kiba bun ki jaka.
Ha Ri-Bhoi, ka jingtwa khyndew kala jia ruh ha surok Shillong-Guwahati Highway hynrei da ka jingshimkhia marmar jong ki Pulit ka Nongpoh bad ki borkhmih ka NHAI, la lah ban pynkhuid noh ia ka ktieh ha kane ka surok NH-6 bad ki kali kila iohban iaid biang kumba ju long.
Ha Eastern West Khasi Hills, ka Meghalaya State Disaster Management Authority kala pyntip ba ka eriong erngit kala pynjulor ia kawei ka iing ha Mawthadraishan Block bad kala ktah ia katei ka shnong ha ka 27 tarik u Jymmang.
Katba ha ka 28 tarik pat, ka eriong kala pynkhyllem ia ki dieng kiba la ban kylla ia ki post elektrik bad kawei ka iing kala julor malu mala na ka jingtwa khyndew ha shnong Nongkhlaw.
Ha South West Khasi Hills, kawei ka iing kala shah pynjulor haka eriong ha ka shnong Mawten kaba hap ha Mawkyrwat Block haka 28 tarik u Jymmang.
Kala don ruh ka jingtwa khyndew ha ka 13TH KM MR Road kaba laktah ia ki 4 tylli ki shnong jong ka jong ka SouthWest Khasi Hills District bad kala don ka jingduh iaka bording elektrik naduh ka 26 tarik u Jymmang.
Ha East Khasi Hills kala don ka jingtwa khyndew ha Kenches Trace, hajan Rilbong Beat House, kala don ka jingtwa khyndew ha Mawlai Bypass ha kaba 4 ngut kila mynsaw bad la pynkit nohia ki sha NEIGRIHMS na ka bynta ban ioh ia ka jingsumar.
Kala don ruh ka jingtwa khyndew ha surok ha Tyrsad kaba hap ha Mawphlang Block ba kane ka jingtwa kala pynlong syndon ban khanglad iaka leit ka wan na katei ka surok.
Ha East Jaintia Hills, kawei ka kynroh maw jong kawei ka iing kala khyllem kynsan ha ka shnong Sutnga Weilong bad uwei ula duh noh ia la ka jingim ha kane ka jingjia.
Ha South West Garo Hills, kala don ka jingkhie jong ka eriong ha ka 27 bad 28 tarik u Jymmang ha kaba kala pynjulor iaki katto katne tylli ki iing bad pynkhyllem ruh ia ki post elektrik.
Ha South Garo Hills hynne ka sngi, kila don katto katne tylli ki dieng kiba la khyllem hynrei ym pat ioh ia ki jingtip halor kaj ingjulor jong kino kino ki iing, katba ha West Garo Hills ruh kala don ka jingkhyllem ki dieng hapoh Tura bad ka tnad jong ka PWD Road ka dnag ialeh ban weng ia kitei ki dieng katba ka tnad MeECL ka dang ialeh ban pynbiang biang ia ka bording elektrik ha kitei ki jaka kiba la shah ktah.
Ha East Garo Hills, ka Meghalaya State Disaster Management Authority kala pyntip ba kala don ka jingpom u pyrthat ha Rongrong Bolsongsok hapoh Songsak C&RD Block ha ka 26 tarik u Jymmang ha kaba ar tylli ki iing kila shah pynjulor bad kala ktah ia ki 6 ngut ki briew ha katei ka shnong. Kala don ruh ka jingkhyllem jong ki dieng, ki sainar elektrik ba katto katne tylli ki iing kila shah pynjulor.
Ha North Garo Hills : Kawei ka skul bad 22 tylli ki iing kiba hap ha Kharkutta Block kala shah pynjulor haka eriong ha ka 27 tarik u Jymmang bad kane ka jingjia kala ktah ia ki 125 ngut ki nongshong shnong ha ki 7 tylli ki shnong.
Nalor kane kala don ruh ka jingkhyllem jong ki dieng, ki sainar elektrik ba katto katne tylli ki iing kila shah pynjulor haka 28 tarik u Jymmang.
Na ka liang ki bor pyniaid District kila peitngor bha ia ka jinglong jingman ka suinbneng ha baroh ki distrist ka Jylla.
Lah ban kdew hangne ba ka Sorkar Jylla kala dep ai lypa ia ka song tyngka ba mar T.20 klur sha baroh ki District ba kin iarap ia ki lanot.
