Shillong, Nohprah 01: U Myntri ka tnat Social Welfare u Bah Paul Lyngdoh hynne ka sngi ula ong ba ka jingpynbna paidbah (Notification) bala pynmih daka tnat Social Welare ba ong ba ka kurim bym dei Khasi ka lah ban ioh syrnod Scheduled Tribe (ST) certificate ka long kaba phylla.
Haba kren sha ki lad pathai khubor u Bah Paul ula ong “Nga la pan iaka File bad ngan pule bniah katkum ka jingdonkam”.
U Bah Paul ula ong “Ka long kaei kaei kaba sngewphylla ban ioh jingtip ba don kum kata ka jingpynbna (Notification) namar iaka ain la dep mynjur daka District Council bad la ioh jingmynjur ruh na u Lat ka Jylla kaba mut ba ka Sorkar ruh kala dep ban bishar bniah bha”.
Katkum ka jingong u Bah Paul “Kan nym don shuh ka jingpynbna (Notification) ka ba lah ban pynjah iaka ain khamtam haba ka ain kala ioh jingmynjur na u Lat”.
Lah ban kdew dang shen ka Hynniewtrep Youth Council (HYC) kala dawa ban weng noh iaka shithi bala pynmih da u Ophisar ka tnat social welfare department kaba la ialam bakla iaka KHAD (Khasi Social Custom of Lineage) Act, 1997.
Ka shithi naka tnat ka kdew “Ka Lineage Act, 1997 kam khanglad ban ioh syrnod ST Certificates hadien ka jingtang jait na ka kmie ne u kpa bad ka jingshim jait jong u kurim daka kurim ka bym dei Khasi”.
“Ka shithi na Under Secretary shaka Sorkar jylla ka tnat Social Welfare ka long beain bad ka long pyrshah iaka riti dustur bad ki ain tynrai jong ki Khasi bad ka ia tyngkhuh bad ka ain KHAD (Khasi Social Custom of Lineage) Act, 1997 bad pyrshah iaki kyndon hapoh kane ka ain” la ong ka HYC.
