Nongpoh, Jymmang 18 : Ka Kur Syiem Nongshai Pyllun, kala pynpaw ia ka jingkyndit bad ka jingbym pdiang halor ka jingwengkam shipor (sospon) jong ka Khasi Hills Autonomous District Council (KHADC) ia u Bah Wanphrang Syiem Nonghai kum u Sirdar jong ka Nongpoh Elaka.
Kane ka sur jong ka Kur Syiem Nongshai kala mih na ka jingialang jong ka Dorbar Kur Syiem Nongshai Pyllun kaba la pyniaid da u Chairman ka Kur Bah Phrel Syiem Nongshai ha ka jingiadonlang ki kni rangbah ka kur ba kynthup ia u bah Spinroy, Medras, Webstar bad kiwei kiwei.
Lah ban kdew, ba dang shen ka District Council ka la bthah ia ki nongkitkam ka Nongpoh Elaka Sirdarship ban wengkam shipor ia u Bah Wanphrang Syiem Nongshai kum u Sirdar hadien ki jingujor sha ka Council. Ka Council kala thung da u Bah Pilar Stone Syiem Nongshai kum u Acting Sirdar jong ka Elaka.
Haba iakren bad ki nongthoh khubor, ki Rangbah Kur ki la pynpaw ia ka jinglyngngoh halor ka jingweng shipor ia u Bah Wanphrang na ka khet kum u Sirdar ha kaba ki la pynpaw ruh ba kum ka Kur ruh kim shem la ioh ia ka jingpynshai bad haduh mynta hi ki dang ibit beit ia u Bah Wanphrang ban bat ia kane ka kam kum u Sirdar.
Ki la pynpaw ruh, ba tang mar ia ioh jingtip halor kane ka jingshah pynkhein Sirdar u Bah Wanphrang Syiem Nongshai, na ka liang ka Dorbar Kur Syiem Nongshai Pyllun ka la lum kyrkieh ia ka jingialang kaba la long dang shen bad ha kane ka jingialang ki la ia rai ban pynskhem ia u Bah Wanphrang ban shimti ia kane ka kam kum u Sirdar.
Kila kynnoh ruh ba kane ka jingshah pynkhein Sirdar ka dei tang ka daw bishni hapdeng kawei pat ka kynhun kaba la kam ba ki don ki kni rangbah, hynrei napdeng ka Kur Nongshai hi ka dang shaniah bad skhem ka jingmut ban aiti beit ia ka khet Sirdar ia u Bah Wanphrang.
Kila pyntip ba shen kin sa leit sha KHADC ban ia kren halor ka hok jong u Bah Wanphrang Syiem Nongshai.
