Shillong, Lber 01: Ki nongthain jingthain bad ki nongseng kam lajong jong ka jylla kila ioh ia ka jinghikai ban pyndonkam ia ka mobile application kaba la tip kum ka ‘Tracestore’ kaba la pynwandur ban pyniasoh ia ki bad ia ki iew ki hat ha ryngkat bad ban pyninam ia ki mar ki jongki.
Ia kane ka jingai jinghikai la leh ha ka jingialang “Artisans and Entrepreneurs”, kaba la long ha ka sngi Thohdieng ha North-Eastern Hill University (NEHU) kum shi bynta jong ka project “Empowering Artisans and Farmers of Meghalaya through Blockchain Fintech Solutions” kaba la pynlong da ka Department of Basic Sciences and Social Sciences, NEHU ryngkat ka jingiatreilang bad ka IIT Guwahati bad IIT Bhilai lyngba jongka projek kaba la bei da ka IBITF.
Kila don 40 ngut ki nongthain jingthain bad ki nongseng kam lajong kiba la wan iashimbynta ha ryngkat bad ki nongtrei, ki nongpyniaid ia ki projek bad kiwei kiwei kiba donbynta lang ha ka kam.
U Director ka Employment and Craftsmen Training Bah J.P. Lakiang kum u kongsan bad u Prof. Md. Iftekhar Hussain, Dean jongka School of Technology, NEHU kum u kongsan symbud kila plie ia kane ka jingialang.
U Dr. Sainkupar Mn Mawiong, Principal Investigator jongka Project, ula pynpaw ia ki jingeh kiba la mad da ki nongthain jingthain bad ki nongseng kam lajong khamtam eh ha kaban iakhun pyrshah ia ki mar kiba la shu shna thok bad ula banjur ba ka ‘Tracestore’ ka plie ia ka lad kaba shngain bad kadei ka e-platform kaban shimkhia ia ki mat bad pynkup bor ia ki nongthain jingthain ka jylla.
U Bah J.P. Lakiang, ula iaroh ia ka kynhun kaba la leh ia ka kam wad bniah na ka bynta ka jingmyntoi jongka imlang sahlang bad ula iaroh ruh ia ka jingtrei shitom jong ki nonghikai, ki nongwad bniah bad ki nongthaw kiba la noh synniang shi katdei ia katei ka projek.
Nalor kane ula batai ruh ia ki skhim sorkar kaba ki nongthain jingthain ki lah ban ioh na ka tnad kaba u khmih.
Lyngba ka Tracestore app la khmih lynti ba kan lah ban wanrah ia ka jingkylla bad ban kyntiew ia ki tiar ki tar kiba la thain hi bad ban die ha ka dor kaba biang.
