Shillong, Jymmang 31: U Myntri uba khnih ia ka Revenue bad Disaster Management Bah Kyrmen Shylla ha ka sngi Thohdieng, ula lum ia ka jingialang bishar kam halor ka jingwan lynshop ki bor mariang khamtam eh halor ka jingshah ktah na u Cyclone Remal.
Ia katei ka jingialang la wan ban iashimbynta da u Sanjay Goyal, Commissioner & Secretary, ka Kong Matsiewdor War Nongbri, Secretary ka Revenue and Disaster Management bad kiwei kiwei ki heh ophisar sorkar na ka SDMA.
Ka jingiakren ha kane ka jingialang kaba bun hi kala long halor ka jingshah pynjulor ha u Cyclone kynthup ia ka jingtwa khyndew, ka jingther u lapbah kaba la ktah ia baroh ki District ha ka jylla Meghalaya.
Ki mat kiba la iatai bha ha ka jingialang ki kynthup ia ka jingjulor kiba kynthup ia ka jingtwa khyndew, ka jingjulor ki iing, surok, ka jingshah pyndkoh ha ka leit ka wan, jingshlei um, bad ki jingtei kiba mad bun eh ka jingjulor bad ki lad ai jingiarap mardor kiba la ai sha ki lanot.
Ka jingialang kala iatai ruh halor ki kam kiba la leh da ka SDMA, SDRF, Deputy Commissioner bad ki 3 tylli ki tnad treikam jong ka MeECL. Kitei ki kynhun kila treikam borbah ha kaban leit ai jingiarap mardor bad jingshakri ia kito kiba la shah ktah khamtam ha kaban trei shitom ban pynbiang ia ki jingdonkam ha ki jaka kiba la shah ktah na ka bor mariang.
U Myntri ula kren ruh halor ki lad jingpynkhreh kiba la shim da ka State Emergency Operations Center, Districts, kiba pyndonkam ia ka Common Alerting Protocol (CAP) ha kaban sam mardor ia ki jingpynbna bad ki jingmaham, ka Emergency Response Support System (ERSS) kaba dei ka App kana ai ia ka jingmaham ha baroh kawei ka ri India.
Ula ban jur ia ka jingdonkam ban iai bteng ban peitngor bad ban long kiba la pynkhreh ia ki sienjam ki ban pynduna na ka jingshah pynjulor ha ka mei mariang ha ki sngi bad ki bnai ban wan.
U Myntri ula pynpaw ruh ia ka jingsngewkhia ha kaba iadei bad ka kam ban wad bniah bad ban ai jingiarap ia ki lanot ha Nongpriang, ki kam ai jingiarap bad ki kam maramot ha baroh ki District.
U Myntri sorkarun leit ruh ban jurip ia ka shnong Nongpriang kaba hap hapoh jpngka Shella-Bholaganj C& RD Block lan hP ha June 1, 2024.
