Nongpoh, Nailur 08: Ban tip shai ia ki jingeh jong ki nongshong shnong ha ki thain khappud bad ruh ban iatai kumno ban weng ia ki jingsahdien, u MLA ka Jirang Konstituensi Bah Sosthenes Sohtun u la lum la lang ia ki nongialam shnong jong ki shnong bapher bapher hapoh ka shnong Killing, Ri Bhoi District.
Haba kren hadien kane ka jingialang u Bah Sosthenes Sohtun, u la iathuh ba kane ka jingialang bad ki nongialam shnong ka long shibynta ban wanrah ia ka jingiajan hapdeng ki nongialam shnong bad u nongmihkhmat kyrpang na ka bynta ban peit ia ki jingduna kiba don ha ki shnong ha khappud bad kumno ban pynneh pynsah ia ka shongsuk shongshngain bad ka jingdonkam ia ki lad pynroi ha kiba bun ki liang.
U la iathuh ruh ba la ioh ban ia kren ia shibun ki mat ba donkam khamtam ka jingpeit pyrman sa ia ka jingkharoi ka jing shalan drok ha ki shnong khappud kaba lah ban ktah ia ka lawei ki khun samla bad ruh ia ka shongsuk shongshngain namar ka jingnang kiew ki kam pyntriem ha kine ki shnong kiba don markhap bad ka Assam.
Na ka liang ki nongialam shnong, ki la pynpaw ia ka jingkmen kaba khraw halor ka jingshimkhia da u nongmihkhmat ka thain, u bym shem la iehnoh ia ki ha kino kino ki bynta, bad lyngba kane ka jingialang kaba kyrpang la lah ban ia mir jingmut ia shibun ki kam khamtam ban kyntiew ia ki shnong ki thaw ha khappud.
Hadien ka jingialang, u MLA ka Jirang Konstituensi u la aiti ia ki dustbin sha ki nongialam shnong na ka bynta ban pynneh pynsah ia ka jingkhuid jingsuba ha ki shnong ki thaw.
