Tura, Kyllalyngkot 10: Ki bor pyniaid district bad ki heh pulit hynne ka sngi Saitjain kila lum ia ka High-Level Peace Meeting ha kaba iadei bad ka jingjia jong ka jingshah thombor ha Goalgoan–Rajabala.
Ia kane ka jingialang la pynlong ha Tura Circuit House, ha kaba ki nongiashimbynta da kawei ka sur kila kyrpad ban long kiba jai jai, ban iatylli bad ban iatreilang ban pynneh ia ka shongsuk shongshngain ha West Garo Hills.
Ia kane ka jingialang la pyniaid da u Vibhor Aggarwal, Deputy Commissioner ka West Garo Hills bad la wan ban iashimbynta da u Superintendent of Police, ki heh ophisar ka district bad ki nongialam niam bad nongialam shnong.
Ki nongmihkhmat na ki seng bad kynhun bapher kiba kynthup ia ka Central Puja Committee, Tura Mosque, Senior Citizens Forum bad Tura Mothers’ Union ryngkat bad ki kynhun sengbhalang na Tura bad na kylleng ki thain, kila wan ban iashimbynta ha ka jingialang.
Ki nongiashimbynta kila banjur ia ka jingdonkam ia ka shongsuk shongsain, ban ia imlang bad ban shim lang ia ka jingkitkhlieh halor katei ka jingmih katei ka jingjia. Ki Nongialam Niam bad Nongialam Shnong kila pynthikna ia ki bor kiba dei khmih ban ai ka jingiatreilang kaba pura ha kaban pynsaphriang ia ka khubor ban long kiba adkar bad ban iakhun pyrshah ia ki jingpynsaphriang ia ki jingtip ki bym shisha bad ia ki hamsaia.
U Deputy Commissioner ula pynpaw ba ki bor pyniaid district ki iengskhem ha kaban pynthikna ban ai ia ka hok na ka bynta u samla uba la khlad noh bad ban pynneh ia ka shongsuk shongsain.
Ula pyntip ba ia ki jingialang jong ka Peace Committee la pynlong ruh ha Rajabala bad Phulbari ban pynkhlain ia ka jingiatreilang ha ki shnong ki thaw.
Kham hashwa kane, u DC ula lum ia ka jingialang ha ka miet jong ka Sngi Thohdieng bad ki nongialam sengbhalang kiba la duh noh ia la u dkhot ha katei ka jingshah thombor, ha kaba la ioh ia ka jingpynthikna ban don ka jingiatreilang bad ban long kiba adkar.
Katba u Abraham T. Sangma, Superintendent of Police, ula ong ba kila dep rejistar ia ka Case bad ki pulit ki dang ki ialeh ban trei shitom kat kaba lah ban iohkem ia ki runar kiba donkti.
Ki pulit kila pynlong ia ka jingkhynra, katba u trai jong ka par maw uba la don bynta bad katei ka jingjia ula phet krad bad jah haduh mynta.
U SP ula maham ban leh da kaba tyngeh pyrshah ia kito kiba pynsaphriang ia ki khubor thok ne ban ialam bakla ha ki rynsan social media bad ka maham ba kum kitei ki jingleh ki lah ban pynthud ia ka shongsuk shongsain. Ula kyntu ia ki nongshong shnong ba kin shaniah beit tang ha ki jingai ia ki jingtip kiba shisha na ki pulit ne na ka police control room.
La pynjur bad la pynbun ia ki pulit ha kylleng ki bynta jongka district bad la pynjur ruh ia ka jingpahara ha ki jaka kiba kongsan bad la pynbiang ruh ia ka jingai jingsynran da ki pulit ha ki bynta kiba donkam. Kala don ruh ka jingiatreilang bad ki pulit Assam khamtam haba katei ka jingjia kadei kaba la jia ha ki thain khappud.
Haba kren halor ki khubor ba kan don ka jingkiewdor ki marbam mardih, u Deputy Commissioner ula ong, ba ka kynhun jong ka tnad Supply kala shah bynshet ia ka kam ban leit jurip ia ki iew ki hat da kaba iatreilang bad ki Bazaar Committee ban tehlakam ba kan ym don ka jingpynkiew ia ka dor.
Ki bor pyniaid district bad ki pulit kila kyntu ia ki nongshong shnong ba kin long kiba jai jai bad kiar na ki kam iaumsnam bad ban ai ka jingiatreilang kaba pura ha kaban pynneh ia ka shongsuk shongshngain ha ka district.
