Bthah ban pynkhlain ia ka jingiatreilang hapdeng ki Tnad
Shillong, Jymmang 02 : U Myntri Rangbah ka Jylla Conrad K Sangma, ha ka sngi Thohdieng, ula lum ia ka jingialang bad ka State Disaster Management Authority (SDMA) lem bad ki Tnad ba don bynta, ban khmih bniah ia ka jingpynkhreh jong ka Jylla ia ka jingwan jong ka aiom slap.
Kiba la iadonlang ha kane ka jingialang ki kynthup ia u Symbud Myntri Rangbah Bah Prestone Tynsong, Myntri ka Koit ka Khiah kong Ampareen Lyngdoh, Chief Secretary Bah DP Wahlang, ki Heh Ophisar na ka IMD, PHE, Health, PWD, Power bad kiwei kiwei.
Ki Deputy Commissioner bad ki District Ophisar na baroh ki District ka Jylla ruh kila iashimbynta lang ha kane ka jingialang lyngba ka video conferencing.
Haba lum jingtip ia ka jingpynkhreh jong ka Jylla ia ka jingwan ka aiom slap, u Myntri Rangbah ula ong ba ka jingiatreilang kaba treikam bha ka dei ban don hapdeng ki Tnad bapher bapher ka long kaba kongsan ha ki jingpynkhreh bad ki dei ban long ym tang ban pynduna ia ki jingktah hynrei ban pynthikna ia ka jingkloi ban ai jingiarap, ka ban pynduna ia ka jingduh bad jingmad jingjynjar bad ban wanrah biang ia ka jinglong jingman kumba ju long.
U Myntri Ragbah ula bthah ba ki jingai jingiarap, ka jingpynbiang ia ka um, bad ki jaka sah ka dei ban long kaba mar mar haba don kano kano ka jingjia.
Haba ban jur ia ka kamram bad ka jingiadon bynta jong ka Block Disaster Management Committee (BDMC), ki Village Disaster Management Committee (VDMC) bad ki Village Executive Committee (VEC), u Myntri Rangbah ula bthah ia ki Deputy Commissioner ban pynlong ia ki jingialang man ka por bad bynrap ba dei ruh ban ai ia ki jingbthah bad ki kyndon treikam sha ki seng kiba don ha ki shnong ki thaw.
U Myntri Rangbah ula ban jur ruh halor ka jingdonkam ban pynphriang ia ki jingtip sha ki paidbah ha ki shnong ki thaw ha ka lynti kaba dei lyngbaki lad pathai khubor bad da ki ktien trai shnong.
Haba pyntip ia ki sienjam bala shim da ka Sorkar ban pynjanai ia ki lad ai jingtip lypa ia ki paidbah hashuwa ba kan don kano kano ka jinglynshop ka mariang, u Myntri Rangbah ula ong “Man ki thain ki don la ki jong ki jong ki jingshah ktah ba ki shem bad ka Sorkar kala shim ia ka sienjam ban map ia ki kum ka jingshlei um ha Ri-lum Garo bad ka jingtwa khyndew ha Ri-lum Jaintia bad ban wanrah ia ki kor ki bor kiba lah ban batai lypa shuwa ban don kano kano ka jingjia”.
U Myntri Rangbah ula khmih bniah ruh halor ka jingdon jong ki briew ki ban trei ia ki kam, ki tiar ki tar/ki kor kum ka kali puh shilum, ki lieng bad kiwei kiwei.
U la ong ruh ba ka surok, ka um bad ka bording ki dei ki bynta kiba kongsan kiba ju shah ktah jur bad u la bthah ia kine ki bynta ban pynkhreh kham bha. U la ong shuh shuh ba ïa ki mock drill dei ban pynlong man ka por namar ki jingpynlong ia ki mock drill ka iarap ban pynsngewthuh ia ki paidbah kumno ba kin pynkhreh.
