Shillong, Jymmang 02 : U Myntri ki kam jngohkai Bah Paul Lyngdoh ha ka sngi Thohdieng ula pynpaw ba ka Jylla Meghalaya ka dei ban kynjoh ia ka jingwan haduh 20 lak ngut ki nongshangkai shuwa ban kut une u snem.
Haba iakren bad ki nongthoh khubor, u Bah Paul ula pyntip ba ka Tnad kan sa pyllait ia ka tourism calendar ha kine ki artaiew eiei ban wan.
“Kyrmen skhem, da ka jingiapynleit jngmut bha bad phi tip dang hynnin ka sngi, ka Parliamentary Committee kala wan sha Meghalaya bad sah hangne haduh 3 sngi bad phi ioh ia ki khlur pawnam kum u Sachin Tendulkar kiba wan sha Meghalaya-kumta kine ki jingwan ki riewpawnam kala iarap ban kyntiew ia ka Meghalaya kum ka jaka wan shangkai. Kumta, ngi dei ban lah kynjoh ia ka 20 lak ki nongwan shangkai ha une u snem” ula bynrap.
U Myntri u pyntip ba ka Tnad ka dang pynkhreh shaid shaid ban thung ia ki briew ki ban ialong paralok bad ki nongwan shangkai.
“Ngi dang pynkhreh ia kane. Ngi la dep pynmih ia ka jingpynbna. Ngin sa lah ban thung mardor ia 50 ngut ki briew ban long ia ki paralok ia ki nongwan shangkai bad ngin sa sdang shuwa na ka Nongbah ka Jylla. Ki jaka jngohkai kin kynthup ia ka Nan Polok, Golflink bad Khyndailad” ula ong.
