Lum ka Myntri ia ka Health Advisory Board halor ki ‘thei die met’ bad ki ‘nongsumar kynbat’

Shillong, Nohprah 08 : Ka Myntri ka Koit ka Khiah Kong Ampareen Lyngdoh ha ka sngi Thohdieng, kala lum ia ka jingialang jong ka Health Advisory Board bad iamir jingmut ia ki kam ba iadei bad ki ‘kynthei die met’ (sex workers) bad ka jingai jinghikai ia ki ‘nongsumar dawai kynbat’.

Haba iakren bad ki nongthoh khubor, ka Kong Ampareen kala ong “Ka Advisory Board mynta kan khmih ia kine ki artylli ki kam ba kongsan bad ban ai ia ki jingai jingmut sha ka Sorkar ba kumno yn leh bad ban pynkut shisyndon ia ki jingeh kiba mad mynta ha ka imlang sahlang”.

Kala ong ba kan bha shibun ban ai da ki kam sha kine ki Board, kiba la don la slem bha, ia kaba la kynnoh ba ki dei kiba la shu thung da ki riew sain hima sima.

Ka kong Ampareen kala ong ba la kyntu ia ka Board ba kan pynkhreh da ka project ka ban khmih ia ka kam khaii met ki kynthei haba khmih ruh ia ka jingnang kiew sted ka jingpang HIV/AIDS hapoh Meghalaya.

“Nga kmen shibun ban don ia ka jingiasyllok kaba bniah bad ki bad nga la kyrpad ia ki ba kin pynkhreh da ka project ka ban khmih ia ka kam khaii met ki kynthei. Kaba kum kiei ki jingai jingmut ba kane ka Health Advisory Board ka lah ban ai sha ka Tnad ka Koit ka Khiah khnang ba ngin pynthikna ba ngin shim ia ka sienjam kaba dei shuwa ban iakren bad kine ki kynthei die met. Kaei kaba ngi dei ban leh ia kane ka kynhun ki Nongshongshnong, kiei ki kam ba ngi hap ban khmih, kiei ki jingeh ba ngin iakynduh” kala ong.

“Haba khmih ia ka jingkiew sted ha ka jingdon ki nongpang HIV/AIDS hapoh ka Jylla, lada ngim iashong bad iakren paidbah bad iasyllok ia kane ka kam, nga sngew ba ngi kiar ia ka kamram ba ngi dei ban leh khnang ban pynthikna ba ki nongshongshnong kin long kiba shngain, ki nongshongshnong kin ioh ia ki jingai jingmut, ki nongshongshnong kin hap hapoh ka jingkhmih bniah kampher ia kaei ka kam ba ki leh manla ka sngi” kala bynrap.

Ka Myntri ka pyntip ba u Chairman ka Board Bah Mayralborn Syiem ula kyrpad ia ka Sorkar ban shah ia ka Board ba kan iashong bad ki stad ki jhad ha kaban iakren ia ka kam ba iadei bad ki nongsumar dawai kynbat, ki kobiraj, kiba dei ki nongsumar ba paw bha ha kylleng ka Jylla.