Shillong, Kyllalyngkot 30: Ka MSOA hynne ka sngi kala lum ia ka jingialang bad ki rangialehkai ba kynsai jong ka jylla kiba la mih khmat ia ka Ri India ban iasyllok ha kaba iadei bad ki kam ialehkai ha ka jylla.
Ha kane ka jingialang la wan ban iashimbynta da ki 12 ngut ki nongialehkai kiba rim jong ka jylla haka football bad karate ryngkat bad u Bah Fullmoon Pyrtuh uba long u nongialehkai football ba pawnam ka jylla naduh ki snem 1983.
Ia katei ka jingiasyllok la pyniaid da u Bah John F Kharshiing, Working President, ha kaba la iadonlang u Bah Finely L Pariat, General Secretary bad kiwei kiwei ki dkhot jong ka MSOA.
Katei ka jingialang kala rai ban khot ia baroh ki State Association bad ia ki nongialehkai ka jylla kiba la mihkhmat ia ka Ri India (International Athletes) ba kin phah ia ka Bio Data lane ka CV jong kito ki nongialehkai na ka jylla kiba la mihkhmat na ka bynta ka Ri India bad ruh ban ai jingpynbna lyngba ki kotkhubor ba kitei ki nongialehkai kiba paw bad kiba rim bad kiba mynta ba kin phah ia kitei ki jingtip kyrkieh sha ka office jong ka Meghalaya State Olympic Association ha ka email [email protected] lane lyngba ki State Association lane lyngba ka WhatsApp mobile 9436102663 lane 9856041365 ha ne shwa ka 20 tarik February 2023 khnang ban ioh ban lum sa kawei pat ka jingialang jong baroh kiba la mihkhmat na ka bynta ka Ri India hadien kane ka MLA election.
Kitei ki nongialehkai kila ai khublei ia ka MSOA kaba la lum ia katei jingialang bad kila ai jingmut ba donkam ban don ka jingiakynduh sa shisien arsien jong baroh ki nongialehkai kiba la mihkhmat na ka bynta ka Ri India khnang ban thaw ka kynhun kaba kyrpang ban kren halor ki jingeh jong kitei kiba la wanrah burom ia ka Ri.
U Bah John F Kharshiing bad u bah Finely L Pariat, kila ong, hadien ba la mih ka Sports Policy la sngewdonkam ban khot ia ki nongialehkai kiba la mihkhmat na ka India ban iasyllok kumno ban pyntyllun ia ka sports policy ban ioh ia ka jingai jingmut jongki halor ka jingpynkhreh ia ka National Games bad namar ka Meghalaya Sports Policy 2019 ka kular ba ki nongialehkai kiba la mihkhmat na ka Ri India (india international Athletes) kin ioh ia ka sports pension, kin ioh ia ka jingmyntoi lyngba ka reservation policy kaba 15% ha ki kam pulit, home guards bad 10% ha kiwei pat ki kam Sorkar.
