Ngan sa rung noh sha ka jylli sain pyrthei ha Jylla
Shillong, Jylliew 05 : U President ka Congress bad MP barim ka Shillong Bah Vincent H Pala, ula pynpaw ia ka jingsngew nguh iaki paidbah ba kila dep phah ia u haduh 3 sien sha Delhi kum uMP bad pynpaw ba mynta un sa rung noh sha ka jylli sain hima hapoh ka Jylla.
Une u MP ba lai samoi ka Shillong, ula shah pynliem iha u kyrtong ka Voice of the People Party (VPP) Dr Ricky AJ Syngkon da palat 3.7 lak vote.
“Khlem pep, ngan ym klet ia ka kam sain hima sima. Ngan pynleit jingmut noh bad rung noh sha ka jylli sain pyrthei ha Jylla” ong u Bah Pala.
“Nga pdiang ia ka rai u paidbah bad nga sngewnguh iaki nongthep vote ka constituency jong nga ba kila phah haduh lai sien ia nga sha Delhi, ia kaba ngam ju khmih khmih ne phohsniew ha ka jingim jong nga. Nga la pyrshang ban ai ka jingshakri kaba bha tam kat ka jinglah jong nga bad nga kyrmen ba ka jingiadei jong nga bad ki paidbah kan iai neh beit” ula bynrap.
U Bah Vincent ula pyntip ruh “Nga la dep kren ia u Bah Ricky bad nga kitbok ia u haba aikhublei ia u. Na ka bynta ka party jong nga bad ka Iing ka sem, nga ai khublei ia ki nongthep vote ka constituency”.
Ha kajuh ka por, u MLA ka Congress na Gambegre Saleng A Sangma ula thaw histori da ka jingpynliem ia ka para u Myntri Rangbah ka Jylla ka Agatha K Sangma da palat 1.55 lak vote n aka 6.74 lak vote.
U Bah Vincent u ong ba ma u lem bad u Saleng kin sa leit sha Delhi ban pyndep ia ki kot ki slab a donkam bad ban iakynduh iaki Nongialam ba hakhlieh ka party.
“Hadien ba ngi wan phai na Delhi, ngin sa pynlong ia ka jingialang pynkup burom ia u 9Saleng)” ula ong haba pyntip ba yn sa thaw ruh ia ka Committee ban pynkhreh ia ki jingdonkam na ka bynta ka elekshon District Council ha Ri-lum Khasi bad Jaintia.
Haba kylli, une u Heh ka Congress ula ong b aka lyer ka beh kumjuh ha Shillongbad Tura Parliamentary constituency. “Ki paidbah kila kwah ia ka jingkylla bad ki paidbah kila duhthiah duhdem namar kiba bun ki daw” ula bynrap.
