Shillong, Lber 27 : U Chief Secretary ka Jylla Bah DP Wahlang ha ka sngi Balang, ula lum ia ka jingialang bishar kam halor ka jinglong jingman ka suk ka sain ha Jylla kynthup ia ki jaka khappud bad ka Assam, hashuwa ka jingwan jong ka elekshon Lok Sabha ka ban long la 19 tarik Iaiong.
Ha kane ka jingialang la wan ban iashimbynta da u Additional Chief Secretary Home (Police) Department, Dr Shakil P Ahammed, Director General of Police, Dr Lajja Ram Bishnoi, IPS, Commissioner and Secretary, ERTS Department, Sanjay Goyal, Chief Electoral Officer, Meghalaya, Dr BDR Tiwari, ki Ophisar ka Election Department, Secretary, Home (Police) Department, u Inspector General Frontier Headquarters, BSF Meghalaya, bad u State Police Nodal Officers, MK Singh ha Conference Hall Main Secretariat, Shillong.
U Bah Wahlang ula pan jingtip halor ki kam kiba iadei bad ka jingpynkhreh ia ka elekshon Lok Sabha ha kaba u DGP ka Jylla, ula ai ia ka jingbatai halor ka jinglong jingman ka suk ka sain ha Jylla bad ha ki jaka khappud.
Ula pyntip ruh ia ka jingiatreilang kaba iajan bad ki Pulit ka Assam ban pynneh ia ka jingsuk hapoh ki jaka khappud. Ka Election Commission kala buh ia ka jingialang Inter-State Border Meeting bad ka Assam ha ka 3 tarik Iaiong.
Ka jingialang kala iakren ruh halor ki sienjam bala shim ban peit pyrman ia ka jingrung jingman ha khappud ka Jylla ba marjan, ka jingkhang/set ia ki nongpynkulmar shnong, ka plan ban peitngor bad khang ia ka entry abd sxit point ha ki jaka khappud ba synjor bad ka Assam, ka jingpynbna tyrkhong kyiad, pyntreikam ia ka NBW bad kiwei kiwei.
