Shillong Jylliew 06: U Nongialam ka NPP bad u Myntri Sorkar ka jylla u Rakkam A Sangma hynne ka sngi Palei ula ong ba tang 50,000 vote na ka 2 lak ka vote kaba la ioh da ka NPP ha rilum Garo kala leit sha kiwei pat ha ka elekshon MP Lok Sabha kaba dang shu dep.
Ka Agatha K Sangma kala shah pynrem ha u MLA ka Congress na Gambegre u Saleng A Sangma da palat 1.55 lakh vote.
“Na ka vote jong ka NPP, kala don tang 50,000 vote kaba la leit noh shawei bad katei kadei namar ba kila don ki ishu kiba iadei bad ki iingmane, don kiba la shna thok ia ki video. Baroh kitei kila jia bad ki paidbah kim tip la ki dei kiba shisha ne em. Hynrei ngi hap ban pdiang ia ka rai jong ki paidbah kiba kwah ban ioh noh da u MP bathymmai” ong u Rakkam haba iakren bad ki nongthoh khubor.
“Ha Garo Hills kala don kawei ka Video kaba la shna da ki riewshimet ha kaba kila pynwandur ia ka lut T.500 ha kaba la pyni ha kawei ka liang ka don da ka dur jong ka Blei Durga bad ha kawei pat ka liang ka don da ka dur jong ka Ram Mandir bad ka thoh ba ka NPP bad ka BJP kin sa pynmih thymmai ia katei ka pisa bad hato ki Khristan kin ai kum ka bai kynshew ha ki ïingmane da katei ka pisa? Kila shna ia kum kitei ki video bad bun ki briew kim tip eiei bad ki briew kila ngeit beit ia katei” ong u Rakkam.
U Rakkam ula kyntait ba ka Agatha kala pulom ban treikam kum ka MP ka Tura bad ula ong, “Kala leh bun bha ki kam, kala rah ia ki ishu hapoh jong ka Parliament. Imat ki paidbah ki kwah ia ka jingkylla. Ngi hap ban pdiang da kaba sngewbha ia ka rai kaba la shim da u paidbah. Ki paidbah kila vote ia u Saleng, ngi hap ban pdiang ia kata”.
“Wat ha rilum Khasi kala don tang 50,000 vote jong ka vote ka NPP kaba la leit noh shawei. Ngi dang khlain bad nga tharai ba ka NPP kan sa wanphai biang ha ka bor” ong u Rakkam.
Nalor kane, ula ong ba baroh 2 ngut ki MP ka jylla kin hap ban shong ha ka liang pyrshah hapoh ka Parliament.
“La kidei ki MP na Shillong bad Tura, barih arngut kin hap ban shong ha ka liang pyrshah. Ngam tip shuh hato kin lah ban wanrah ia kano kano ka roi ka par bad ban pynbeit ia ki ishu bad kane kadei ka khana kaba da kumwei pat” ong u Rakkam.
Ha kaba iadei bad ka jingiakhun u Bah Pala ia ka elekshon MLA kaba la dep, u Rakkam ula ong, “U (L) PA Sangma ha ka por b aula long u MP ula iehnoh ia katei ka kam ban wanphai sha ka kam politik ha ka jylla da kaba iakhun ia ka elekshon na Tura ban long MLA, kumta kum u MLA ula lah ban treikam kham bha ban ai jingshakri ia ki paidbah”.
Ula ong ba wat u Saleng ruh u lah ban wanphai biang sha ka kam sain pyrthei ha ka jylla.
“U Saleng ula long MLA la 15 snem. Mynta kum u MP yn hap ban sdang ia ka lynti iaid kaba thymmai kaba don ia ka jingkitkhlieh. Lada ym sngewtynnad kumba long u Bah Pala ne PA Sangma ha ki snem kiba la leit, u lah ban wanphai biang sha ka kam saiñ pyrthei ha ka jylla ban iakhun biang ia ka elekshon” ong u Rakkam.
Ula ong ba ki arngut ki MP na Shillong bad Tura kidei ban pynlong ia ka ri ba kan sngap ia ka jingpynsngew kaj ongki.
“Nga kitbok kitrwiang ia u Saleng namar ba ki paidnbah kila vote bad pynjop ia u ha ka elekshon bad ki don ia ki jingangnud kibakhraw bha. Nga khmih lynti bay n leh bha hapoh ka Parliament” ula ong.
U Rakkam ula ong, “U Bah Vincent Pala ula pulom ha kaban pynkohnguh iaka sorkar pdeng halor ki mat bad ki ishu kiba bun.
Mynta kan don ha ki kti jong ka VPP lyngba u Bah Ricky AJ Syngkon ban pynkohnguh hapoh Parliament ban pynurlong ia ka jingangnud jongka jylla bad ka por kan sa batai iak arukom iaid bad ia ka rukom long.
“Ki paidbah kila vote bha ia ka VPP hynrei ngin sa ia peit haduh katno kan lah ban neh. Lada u Bah Syngkon ula trei bha bad ula lah bna pynurlong ha kaba iadei abd ka kyrduh kam kyrduh jam, ka shongsuk shongshngain bad ka ILP, ki paidbah kin sa peit ia ka kaiphod treikam ia man la iwei pa iwei I nongialam. Ngi lah ban pynbiej shisien ia u paidbah bad ngim lah ban pynbeij ia ki arsien” ong u Rakkam..
Ula ong ba ka VPP mynta kam dei shuh tang ka seng kaba buh tang ki jingdawa, mynta kin hap ban long ruh ki seng saiñ pyrthei kiba don ia ka jingkitkhlieh, kila don ia u MP bad kala dei ka por ka jongki ban kin trei bha.
