Nongpoh, Jylliew 19: Ka lympung ïalehkai ball jong ka Ophis u District Sports Ophisar Ribhoi District kaba la tip kum ka District Level Inter School Subroto Cup Football tournament ka la poi noh sha kaba kut hapdeng ka jingïakhun phainal ki 6 tylli ki skul naka them Ribhoi ha kaba la wan ban pynhap pyrda da u MLA/MDC ka Mawhati u bah Charles Marngar.
Ha ka jingïakhun Final jong ki kynthei kiba hapoh ka 17 ka rta, ka Saiden Secondary School ka la ïa khun pyrshah ïaka Christian Hr. Secondary School.
Ka jing ïa knieh ban rah ïaka nam lah duh ka long shisha kaba itynnad bad kaba ïa khaid bad khlem don ba lah ban pynkhih ïaka jar wat hadien ba la pynjlan ïaka por, hynrei dei hadien ba la pyn ïa shut daka tie breaker, ka Christian Hr. Sec. School ka la lah ban pynliem noh ïaka Saiden Secondary School.
Haka jingïakhun ïaka phainal jong ki shynrang kiba hapoh ka 15 snem ka rta, ka Nongjri Presbyterian Secondary School ka la lah ban pynliem noh ïaka Mynken Christian Hr. Sec. School. Lyngba ka tie breaker.
Ha kawei pat ka ingïakhun ïa knieh ban rah ïaka nam lahduh jong ki shynrang kiba hapoh ka 17 snem ka rta, ka Mynken Christian Hr. Sec. School ka la lah ban pynliem noh ïaka Nongjri Presbyterian Secondary School da shi kol la not.
Hadien ba la wai noh ka jingïalehkai naka liang ka ophis u DSO Ribhoi ka sam ruh ïaki khusnam sha baroh ki skul ki ba kynthup naduh ki kynhun lahduh bad ki kynhun uba la shah rem noh ha katei ka phainal bad kumjuh la sam ruh ïaki khunsam shimet.
Naka liang ka ophis u DSO ka la pyntip ruh ba Kitei ki skul kiba long kum ki lahduh kin ïoh ban leit mih khmat naka District ban leit ïa shim bynta haka State Level Subroto Cup ka ban sa long ha Nongbah Shillong.
